Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den dach vander presentacie van Marie]

[Vp den dach vander presentacie van Marie]

Item vp den dach vander presentacie van Marie, diemen heet onser vrauwe van Melanen, den.xxi.sten dach van Nouembre, ende was vp eenen sondach voor die noene, so was die stede van Brugghe in grooter noot, ende twas seer mistich wedere datmen nauwe ghesien en conste ouer die veste, ende doe waren die vanden Damme ende vander gaerde wel.xij^c.peerden ende.ij.duysent voetganghers wel voorsien, ende die heren vanden Vryen waren met hem lieden Ende alle die capiteynen waren ghecleet in swarten fluweele, ende laghen te scheipsdale buyten der ezelpoorte. Ende hadden toe ghemaect.xij.ruyters in vrauwen abyten met coruen met buetere, ende met eyeren, ende vischmanden met broot, ende quamen voren om also die poorte in te nemene, ende souden die wakers doot ghesleghen hebben, ende dan al tvolck inne ghelaten hebben, ende hem lieden volchden.xij.ruyters met stalen boghen, die waren noch buyten aen dye huysen voor dezelpoorte als dandere in die poorte som waren, ende midts dat dandere nyet rasch en volchden so hadden die wakers quade suspicie. Ende doe wasser een vrauwe dye seyde, certeyn het sijn mans ghecleet in vrauwen abyten. Doen stackmen terstont die barriere toe, ende clopte tclocxken vp die poorte alaerme, ende den roup quam al die stede duere in allen kercken ende in allen plaetsen dat sy binnen der stede waren ende dezelpoorte ghewonnen hadden. Huyten welcken terstont so veil volcx ten poorten ende ter vesten was dattet onmueghelick scheen te sijne, want twas elcken om lijf ende goet gedaen. Ende waren so versaecht die also in vrauwen habyten waren dat sy niet naerder commen en dorsten so si som daer naer seyden, want hem lieden dochte dat si so onnoemelic volc saghen dat sijer in versaecht waren. Ende meenden als doe wel dye stede ghenomen te hebbene, want si vele vrienden binnen der stede hadden, want daer was bouen in scofhec vander poorte eenden stoc ghesleghen, so datment niet neder laten en mochte. Ende dat hadde ghedaen een winnebroot soomen seyde, want het als doe sijn wake ter poorte was, maer bi der gracien gods si sloughen saulte van harer meeninghe. Ende siende dat sy ghemist hadden, van quaetheden staken tvier in vele huysen te scheipsdale als si vertrocken.