Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxviij.sten dach van Nouembre. Anno.xc.]

Item vp den.xxviij.sten dach van Nouembre. Anno.xc.so trocken die van Brugge sauens in den voor auent huyte met schepen, wel voorsien met engienen, ende den capiteyn metal den garnisoene ende sommege ambochtslieden mede naer der sluys, duer die oude vaert om coorne ende ander vitaelgie, want si in groter noot waren, ende en mochten van niement ghesercoureirt worden dan van die vander sluys, ende van mijn here van Rauesteyn, want si nyement anders binnen Vlaendren te vriende en hadden. Ende daer was ooc gheordonneirt datmen noch seynden soude.v^c.mannen ambochtslieden vanden ghenen diere best toe dienden, yeghen dat si weder commen souden vander sluys, vp auentuere of hem lieden die van Damme eenich belet wilden doen als wel scheen, maer dit volck en quam niet tijts ghenouch. Want int wederkeeren vanden seluen schepen metter vitaelgie vander sluys, commende byder brugghe tusschen Oostkercke ende den Damme soe was daer mijn here van Nassauwe met al sijnder macht vanden Damme. Ende daer was Ioris Pycauet capiteyn van Brugghe met sijnen volcke bespronghen. Daer was seere gheuochten, ende daer bleef vele volcx, alsoo wel vanden ruyters vanden Damme als van die van Brugge, want Pycauet hem seer vromelick daer weerde, maer ten sijne hi bleefter gheuanghen, ende noch vele andere met hem, ende vele bleeffer doot, metsgaders dat dander volck van Brugghe nyet in tijts en quam. Ende smorghens ontrent den.vij.hueren quam die tijdinghe te Brugghe dattet al verloren was, ende den capiteyn gheuanghen, ende veil andere gheuanghen ende doot gheslegen Ende den capiteyn Ioris pycauet was gheuoert ten Damme, twelc wel een drouue mare was voor die van brugge, maer daer wasser sommege diere inne verblijden.

¶ Item es te wetene dat dye ambochten vp desen seluen tijt hadden ghedaen vanghen eenege personen, die men te laste leyde dat sy van desen saken wel wisten, ende van tghene datter ghebuert soude hebben vp onser vrauwendach vander presentacie, vanden welcken die ambochten versochten iusticie van dien personen ghedaen te hebbene, in dien sijs beschuldich waren. Ende vp den seluen dach dat Pycauet gheuangen was, so quamen die vrienden vanden voorseyde poorters, ende begheerden aen die.ix.mannen die ghenomen waren om doorloghe te beleedene, dese voorseyde personen te lichtene ende ontsleghen te hebbene in alder manieren, twelc alsoo ghedaen was. Ende als doe eenege die met mijn here Phelips van Rauesteyn toe waren, meenden eene vprijsinghe te makene, metsgaders eeneghe vander seluer bende, daer huyt dat commen was eene grote orloghe, ende dye stede van Brugge in groter noot ende verdriet.