Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item daernae waren gheordonneirt schepen wel ghestoffeirt met engienen,

[Den.xv.sten dach van Nouembre]

metten welcken men trac lancx der leye tot in dye prochye van Oorscamp, daermen alle die voorseyde schepen loet met coorne ende met ander grane, ende alle dat die vrauwen ende kijnderen draghen mochten was in die voorseyde schepen gheladen. Ende Ioris Pycauet capiteyn van Brugghe was byder groter steenbrugghe wel met.viij^c.mannen, ende daer quamen eenege vander gaerde die welcke meenden ons volc te beschamene, maer si en keerden niet alle weder Toudenburch, wantter daer een deel doot ghesleghen bleuen, ende int wech trecken naer Oudenburch hadden wel gheuanghen.ij^c. vrauwen, maer si waren so rasch gheuolcht dat si die moesten loochenen ende achterlaten, ende die schepen waren ghebrocht te Brugghe metten coorne. Maer die voorseyde Henewiers hadden in een vanden schepen tvier ghesteken, maer twas noch ghebrocht in die stede metten anderen. Ende dit gheschiede Anno.xiiij^c.ende.xc.den.xv.sten dach van Nouembre.