Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Ende aldus was binnen Brugghe groote aermoede]

[Den.xij.sten dach in Nouembre]

Ende aldus was bin-

[fol. CC.lxviij.r]

nen Brugghe groote aermoede, ter cause vander voorseyde orloghe die mijn heere van Nassauwe so stranghelic voerde vp die stede van Brugghe, metsgaders die vanden Vryen die te Rijssele fynanchie deden mijn here van Nassauwe, daer mede dat hi die Henewiers ende andere van sijnen volcke mede betaelde. Maer daer naer alsoo ten Damme gheboden was, so worden die van der gaerde. Ende die ruyters die te Vassenare laghen vinghen alle die vrauwen ende steldense te rentsoene, twelc daer te voren noeyt ghesien en was, want sijere wel.xxv.vinghen vp eenen dach, die si al rentsoeneirden ende hieldense te Vassenare in een sterc duyue cot tot si haer rentsoen betaelt hadden. Ende dit daden si want si gheen mans en consten ghecrijghen, ende lettel ghelts ontfinghen van huerlider saudye daer si by leuen mochten. Aldus en mochtmen gheen vrauwen meer huyt seynden om vitaelgie, noch om eeneghe andere saken, byden welcken die stede te meer ghebrecx leedt, wat dye vrauwen der stede groot sercours daden, dus wasser die stede van Brugghe qualick aen, want si nyement te vriende en hadden in tgheheele lant, dan alleenlic Sluys ende mijn here van Rauesteyn voornomt. Dit was Anno.xiiij^c.ende.xc.den.xij.sten dach in Nouembre.