Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die van Brugge dus in groter desolacie sijnde]

[Den.xiiij.sten dach van Nouembre]

Item die van Brugge dus in groter desolacie sijnde, ende van nyement gheen sercours noch bystant en hadden, vonden in hueren raet dat si huyt maecten twee gheestelicke persoonen, te wetene meester Adriaen de mil vanden predicaren ende meester heyndrick vanden Caermers beede doctueren in Theologie, dye si sonden binnen der stede vanden Damme bi mijnen here van Nassauwe, om te ghecrijghene een goet apointement tusschen mijn heere van Rauesteyn ende mijn here van Nassauwe, ende die van Brugge. Maer mijn here van Nassauwe en wilde niet hooren, als aengaende van mer Phelips van Rauesteyn, maer dat si scheeden wilden van mer Phelips van Rauesteyn, ende dan soudemen van paeyse spreken. Ende met deser antwoorde trocken dye voorseyde twee doctueren naer Brugghe weder omme. Ende int wederkeeren vanden voornomde gheestelicke personen, waren vergadert alle tghemeente van Brugghe, ende daer was hem lieden te kennen ghegheuen trapoort vanden voorseyde personen. Waer vp dat die voornomde twee gheestelicke persoonen weder ghesonden waren ten Damme bi mijn heere van Nassauwe, maer ne waren niet ghelooft en Damme binnen te commene om huerlieder rapoort te doene, maer moesten weder keeren sonder antwoorde of bescheet te Brugghe. Ende dit was den.xiiij.sten dach van Nouembre.