Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.xxv.sten in Octobre so quam een herault vanden Coninck van Vranckerijcke]

Item den.xxv.sten in Octobre so quam een herault vanden Coninck van Vranckerijcke, ende brochte met hem brieuen aen die stede van Brugge, inhoudende vp dat den paeys niet voort en ghinghe, so soude die coninc van Vranckerijcke der stede van Brugge sulcke assistensie doen van volcke, ende ooc van vitaelgie, byden welcken si commen soude tot hueren rechte. Ende die voorseyde bode verstaende dat mijn heere van Nassauwe ter sluys waert was, terstont sonder letten trac metten seluen brieuen ter Sluys bi mer Phelips van Rauesteyn omme dat sijn bootschap te bet verstaen soude sijn, ende dat mer Phelips soude weten wat sijn brieuen inhilden.

¶ Item es te wetene dat alle die boomen dye ontrent Brugge stonden binnen der haluer mijle, die waren alle gheabandoneirt, ende elckerlijc mochtse vellen ende inhalen tsijnen schoonsten, ende maecten daer barninghe of, wantet seere cout weder was, ende tvolc conste qualic aen barninghe gheraken, so datter luttel boomen bleuen staende binnen der haluer mijle.