Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item mijn here van Nassauwe quam ter sluys vp den.xxvi.sten dach van Octobre]

Item mijn here van Nassauwe quam ter sluys vp den.xxvi.sten dach van Octobre, omme te tracteirene van paeyse, daer was mer Phelips van Rauesteyn, mijn here van Nassauwe, mijn her van Beuere, ende meer andere heeren. Ende sonderlinge aengaende tstick van Brugge, so begheerde mijn here van Nassauwe te hebbene.iij^c.personen om sijne wille ende gheliefte mede te doene, ende noch bouen dien.iij hondert duysent croonen. Ende mijn here phelips dit verstaende, en wilde daer inne nyet consenteren, ende en wilde nochtan niet scheeden van dye van Brugge om gheen paeys te makene, maer met redenen so soude mer Phelips wel te vreden gheweist hebben, maer aldus so en ghinc den paeys vp dien tijt noch niet voort. Ende doe was buyten ter Sluys in ghesteken, omme te commene duer doude vaert vander Sluys te Brugghe,

[fol. CC.lxvij.v]

midts datmen ten Damme met gheene schepen passeren en mochte, ende om datmen van ter sluys soude moghen bringhen coorne ende andere vitaelgie te Brugghe, want daer groot ghebrec van coorne was vp dien tijt.