[Item vp den.xxiiij.sten dach van Octobre]
Item vp den.xxiiij.sten dach van Octobre, so trac mijn heere van Nassauwe naer der sluys bi mijn here phelips van Rauesteyn, ende was doe daer mijn here van Beueren ende meer andere grote heren om te communikierene deen metten anderen, om te gherakene tot eenen goeden paeyse, waer inne die voorseyde heren laboreirden. Maer eer mijn here van Nassauwe van den Damme vertrac naer der sluys, so dede hi onthoofden den Inghelschen capiteyn die de stede van Brugghe ghedient hadde, dye welcke huyt rijden soude om een course te doene ontrent met.xx.peerden, die welcke met hem reden huyter stede van Brugghe van welcke.xx.warender.ij.gheuanghen te Dudzeele, waer of Dijnghelsche Capiteyn deene was, ende waren ghebrocht binnen den Damme vp den.xxij.sten dach van Octobre, ende vp den.xxiiij.sten was hi onthooft. Ende eenen meester wijlent Pensionaris van Brugghe daer voren of ghenoteirt es, die wasser ooc onthooft, midts den neersteghen veruolghe van mijn vrauwe van Dudzeele, diet seere veruolchde aen mijn here van Nassauwe, omme dat die voorseyde pensionaris so scherpelick examineirde, so dat hi ooc was ghebrocht vanden leuende lijue ter doodt in dye presencie van mijn here van Nassauwe.
Auteursrechtvrij