Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.xxi.sten dach van Octobre]

Item den.xxi.sten dach van Octobre, so verbarnden die van Damme alle die meetstouen die stonden vp den dijck binnen der prochye van Coolkercke, ende vele huysen daer ontrent, daer of dat onnoemelick grote schade quam.

[Vp den.xxij.sten dach van Octobre]

¶ Vp den.xxij.sten dach van Octobre ofte ommer ontrent diere tijt, was ten Damme een ghebodt ghedaen, huyter name van mijn heere van Nassauwen, ende meer andere Capiteynen die daer waren, datmen vanghen ende rentsoeneren soude, also wel die vrauwen van Brugghe als die mans

[fol. CC.lxvij.r]

die men vonde met vitaelgie om te Brugghe te draghene, ende die kinderen in sghelijcx. Ende dat was om dat die van Brugghe gheen vitaelgie en souden ghecrijghen, als bueter, caes, ende eyeren die de vrauwen haelden ten halse, ende hier mede meenden si die stede te mineirene, want sijse anders nyet ghedoen en consten.

¶ Item vp desen seluen tijt so waren Typre gheladen.vi.waghenen met engienen, ende met poedere ende andere artijlgerye van orloghe bi wel wetene vander wet van Ipre, die men ghebrocht soude hebben int heyr vanden Henewiers te Houdenburch, om die stede van Brugghe mede te cranckene naer haerlieder vermueghen ende macht, twelc god van hemelrijcke versach, want het ghemeente wierts gheware, ende si deden die selue engienen weder ontladen.