Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp desen seluen tijt so trocken die van Brugghe voor tcasteelkin van Vassenare]

[Den.xxvi.sten dach van Septembre. Anno.M.CCCC ende xc]

Item vp desen seluen tijt so trocken die van Brugghe voor tcasteelkin van Vassenare, ende meende dat wel of gheworpen te hebbene, ende verbarnden tneir hof, ende beroofden die warande van alle twilt datter binnen was, ende schoten seere vp tvoorseyde casteel. Ende binnen der tijt dat die van Brugghe voor Vassenare waren, so was die gaerde van Oudenburch ghetrocken voor die kercke van Lisseweghe, daer dye lantslieden huyten Noortvrye een stercte vp hilden om die te winnene. Ende vernemende dat dye van Brugghe waren voor Vassenare, quamen die voorseyde vander gaerde der assistencie van dye van Vassenare ende daden daer die van Brugghe eenen groten vploop, meenende dat sijse van daer ghesleghen souden hebben, maer en consten daer aen nyet ghedoen, maer quamen naer Brugghe in ordonnancien onghegrieft. Ende als die vander gaerde saghen dat si daer niet ghedoen en consten, so quamen si naer dye stede, daer si veil volcx buyten vonden ontrent der stede, huyt gheloopen sonder ordonnancie, daer of datser vele den hals of reden ende ooc sommeghe vinghen ende voerdense mede naer Oudenburch, die si hooghelic rentsoeneirden. Ende dit gheschiede vp den.xxvi.sten dach van Septembre. Anno.M.CCCC ende xc.