Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item ontrent den xviij.sten van Octobre hier voren en den laetsten dach van Octobre.]

Item ontrent den xviij.sten van Octobre hier voren, so hadden dye van Damme ghebreck van vitaelgie, ende hadden ghedaen commen wel.xviij.waghens met vitaelgie van westen, die al bi Brugghe passeren moesten, ende die vanden Damme quamen ligghen wel.vi.hondert sterc in sinte cruys kercke, om te wachtene die waghenen die so naer dye stede passeren moesten, maer men wist in die stede niet, hadment gheweten men hadse nyet ghelaten passeren, maer het was bi nachte. Ende smorghens als si vertrocken, verbarnden wel.xij.schone pachtgoeden ende andere huysen. Ende dit was vp den laetsten dach van Octobre. Anno.xiiij^c.ende.xc. Ende men sach doe dicwils die vaenkins ter hallen huyt steken wit ende root te vier houcken, want dye gaerde aen deen sijde, ende die vanden Damme aen dander sijde, twelck deerlic ende compasselic om sien was, ende daden menich alaerme voor die stede bi daghe ende bi nachte.

[Vp den.viij.sten dach van Septembre]

¶ Item vp den.viij.sten dach van Septembre, so was dye voorseyde Inghels Capiteyn ende Adriaen floreins die ballinghen waren, weder in gheroupen, dye welcke stonden ghescreuen in een rollekin, welck hem lieden daer naer coste haer bollekin.