[Item in dien seluen tijt so trocken dye van Brugghe huyt wel met.iiij.of.v.hondert mannen bi Vyuen]
[Den derden dach van Septembre]
Item in dien seluen tijt so trocken dye van Brugghe huyt wel met.iiij.of.v.hondert mannen bi Vyuen, ende doluen daer huyte tconduyt daert varsche water duer comt huyt Malen vyuere ten Damme, om die vanden Damme haerlieder varsch watere te benemenene, ende brochten.ij.langhe sticken vander pijpe te Brugghe ende stoptent toe, so dat daer duere gheen varsch water ten damme en mochte commen. Ende inden seluen tijt was doude vaert verdoluen ende al schone ghemaect, omme datmen al daer soude moghen ghecrijghen eenich sercours vander Sluys ende van mer Phelips van Rauesteyn, want die van Brugge ende mer Phelips malcanderen eedt ghedaen hadden ghetrauwelic by te stane, huyter name vanden hertoge phelips onsen natuerlicken prinche, yeghens alle die huyt waren om die stede van Brugghe te nieten te doene, ende dat mijn here Phelips gheen paeys maken en soude sonder dye van Brugghe welcken eedt ontfinck van alle tghemeente Ioris pycauet, huyter name van mer phelips voorseyde. Ende als doe was ghedreghen eene deuote processie generael met den fiertre van sinte Donas. Ende dyt was den derden dach van Septembre.
Auteursrechtvrij