Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item int eerste van Hoymaent en den.xij.sten dach van Hoymaent]

Item int eerste van Hoymaent waren ghesonden eeneghe ghedeputeirde van Brugghe naer der Sluys bi mer Phelips van Rauesteyn, omme een goet middel te vindene dat alle die maniere van coopmanschepe soude moghen commen te Brugghe, wantter van vele dinghen ghebrec was. Die welcke ghecommitteirde commende ten Damme, waren daer gheuanghen ende ghehouden. Ende Cornelis metteneye die Schouteeten van Brugghe, ter begheerde van die vander wet was ghesonden ten Damme, omme datmen die gheuanghene die daer waren nyet mesdoen en soude. Ende die voorseyde Cornelis vanden Damme ghecommen sijnde, versochte weder aen tghemeente consent omme tghelt of te stellene, ende seyder vele redenen bi, dattet groten oorbaer ware ende der stede profijt soude sijn. Ende hier vp vergadert sijnde ten Freren, gauen antwoorde met ghemeenen accoorde, dat si tghelt niet ofstellen en wilden dan bi ghemeenen accoorde vanden.iiij.landen ende dat te helfte. Ende die antwoorde ende rapoort van dyen ter camer ouer ghebrocht sijnde, die Schouteeten Cornelis metteneye ghinc van stonden aen huyt der camere met verstoorde sinne ende track naer dye ezelpoorte ter steden huyt. Ende dye Burchmeester Ian de boot volchde hem achtere omme weder in die camere

[fol. CC.lxv.v]

te roupene, maer hi en sach hem niet, want bi'dien wech gane quam die stede in groten verdriete. Ende hi aldus wech ghegaen sijne, veruoorderde hem een cleerscrijuere, dye welcke int iaer te voren Scepene van Brugghe gheweist hadde, seggende yeghen den Burchmeestere, here ic salne wel weder halen ende hu ghelieft. Ende den Burchmeestere badt den seluen dat hijere omme ghinghe, ende hem bade dat hi weder quame. Ende dese voorseyde volchdene tot buyten der ezelpoorte, twelc hi dede om beters wille, ende die voorseyde achter halende byden Burchmeestere wedere, ende yeghen hem spreken. Waer vp dat hi antwoorde dat hijere niet mede te doene en hadde, ende liet den cleerscriuere weder om thuysewaert keeren. Ende commende achter den obseruanten, dede den seluen weder ommer roupen ende yeghens hem commen spreken, ende bi hem commende hilt den seluen cleerscriuere gheuanghen, ende leeddene met hem den Damme, al daer hi daer naer onthooft was, ende sijn hooft ghestelt vp eenen glauyeschacht, ter cause omme dat hi hem in die voorledene iaerscare inde marct staijnghe veruoordert hadde vele saken te coene contrarie den Roomschen.coninc. Ende vp den seluen tijt waren ten Damme ooc onthooft sommege vanden ghedeputeirden die daer gheuanghen waren als voorseyde es. Te wetene eerst den Pensionaris vander stede van Brugghe, ende die Dekene vanden tinnenpotghieters, ende dandere bleuen daer liggende gheuanghen tot midwintere daer naer. Ende dit was den.xij.sten dach van Hoymaent dat Cornelis metteneye die Schouteeten wech ghinc. Ende vp den seluen dach begonsten dye van Damme te roouene ende te barnene tot Brugghe voor die poorte, ende daden der stede van Brugghe alle tleet dat si consten ende mochten.