Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.ij.sten dach van Ougst Anno.xiiijc.ende.xc.]

Item vp den.ij.sten dach van Ougst Anno.xiiijc.ende.xc.so vertrocken huyter stede Burchmeesters ende Schepenen ende Raden, ende meer ander lieden huyt vreese vanden ghemeente, want het begonster al wonderlick te gane. Ende vp den seluen dach was bevonden een Schepene vander stede die ter poorten huyt ghegaen soude hebben in vrauwen habyten, ende hadde eenen corf aen sijnen aerm als of hy hadde willen gaen om vitaelgie, maer hi wiert bekent, ende was ghenaemt Iacob van Ghulicke, maer hy was weder omme ghedaen keeren ende gheleet in sijn huys, ende hem was beuolen dat hi huyter stede niet gaen en soude onser consent vanden Capiteyn.

¶ Ende in desen tijt was ghesonden eenen Ioris pycauet van mer Phelips van Rauesteyn, om als Capiteyn te bewarene dye stede van Brugghe, want die stede als doe in groter noot was, metsgaders dat die wethouders ende vele andere poorters vluchten ende hem absenteirden vander stede van Brugghe. Ende die voorseyde Ioris pycauet was ontfanghen byden ghemeenen vander stede, ende dede sijnen eedt die voorseyde stede te bewarene, ten behouue ende huyter name van den hertoghe Phelips onsen natuerlicken prinche.