[Item in Hoymaent waren alle daghe vele differente straetmaren]
[Den laetste dach van hoymaent]
Item in Hoymaent waren alle daghe vele differente straetmaren, om die van Brugge in orloghe te bringhene bi subtijlheden van versoucke van vreimde nyeuwicheden, altoos roerende vp tofstellen vanden ghelde. Twelc mijn heere vanden Gruythuyse altijt achter hilt om sijn singulier profijt, omme dat hy te lossene hadde die renten vanden grute, die welcke noch nyet alle versekert en waren voor den laetste dach van hoymaent, wanttet costumen ende rechten sijn binnen der stede van Brugge losrenten, het ghelt goet te doene.xij.weken alsoot ooc ghebueren moeste. Ende dit ghesciet sijne, so riet mijn here vanden gruythuyse datmen tghelt of stellen soude alsoot in Brabant ghinc, het ware best, ende dat was ten derden
Eenen phelips penninck een oude placke.
den penninc met den.ij.leeuwen.ij.oude placken
Doude phelips ende karolus.ij.groten.iiij.mijten min
Eenen twaeluaert vier mijten.
Een seskin een corte.
Drie corten gafmen voor een corte.
| Een gouden croone | iiij.schellingen groten |
| Eenen Rijnsch gulden. | xx.stuuers |
| Een Andries gulden | xx.stuuers |
| Eenen nobele | ix.schellingen groten |
| Een gouden leeu | v.schellingen groten |
¶ Ende al ander ghelt bilgioen, also wel die fransche munte als alle andere haghemunte. Waer vp vele ouders seyden dattet noeyt ghesien en was, ende dat wi bi stellen van dyen en wijt consenteirden orloghe ghecrijghen soude yeghens die croone van Vranckerijcke, want den paeys van Tours dat niet in en hilt, anders dan die gouden croonen te.xxx.stuuers, ende al andere munte in aduenante. Om twelcke tghemeente niet en wilde consenteren int of stellen als voren, maer die van ghendt stelden het gheldt ten helfte als voorseyde es, naer tinhouden vanden paeys van Tours.
Auteursrechtvrij