Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die heeren quelden ghemeente dicwils omme tghelt ofte stellene]

Item die heeren quelden] ghemeente dicwils omme tghelt ofte stellene, ende wasser dicwijls bi daer toe ghebrocht datment ghedaen soude hebben, maer twas altoos om beters wille ghelaten. Ende

[fol. CC.lxv.r]

omme alle die differenten dye aldus dicwijle ghebuerden, so waren gheordonneirt ghedeputeirde ende ghesonden te Mechelen, omme te middelene die gheschillen vander stede, twelcke daer te dier dachuaert midts der beleedinghe niet voort en ghinc, maer bleuen die voorseyde ghedeputeirde achtere, ende en keerden niet wedere te Brugge. Ende waren andere ghedeputeirde gheordonneirt om te treckene byden hertoge van Zassen om een middel te vindene, twelc si nyet en consten ghedoen, maer bleuen ooc den meestendeel achtere. Dus waren die van Brugge in groter desolacie, metsgaders dat si tghelt niet en wilden of stellen. dyt siende mijn here van Nassauwe trac ten Damme, ende ghinc fortifieren die stede vanden Damme van garnisoene ende van capiteynen, ende maecte Schouteeten Cornelis metteneye. Ende dit was ontrent der sluys omme ganck dat die moeyte begonste weder aen te gane ende te rijsene ter deghe, alsoot wel bleec int achteruolghen, ten groten grieue vander stede van Brugghe, god wilt hem vergheuen diere eens deels cause of was.