[Item den hertoghe van Zassen ende mijn here van Nassauwe versochten dickwille omme tghelt of te stellene]
Item den hertoghe van Zassen ende mijn here van Nassauwe versochten dickwille omme tghelt of te stellene, twelck tghemeente niet consenteren en wilde. Maer tcommuyn vergadert sijnde vraechden hem of sijt consenteren wilden tghelt ofte stellene, ende of si niet en wilden den paeys onderhouden also wel als andere steden, ende wilden wi den paeys onderhouden dat wi tghelt af stellen souden, want si seyden dat wi seere buyten weghe waren dat wijt niet en consenteirden. Ende dus in dese vergaderinghe sijnde, soe gheliefdet gode dat tvolc al van eenen accoorde wiert, ende gauen een generale antwoorde sonder die makelaers, maer daer omme en wast nyet ghelaten. Ende dantwoorde was dese, dat si den paeys wilden houden ende onderhouden, ende orloghe voeren vp hem die der contrarie souden willen doen, ende dat wi gheen infractuers van paeyse en waren al en stelden witghelt also niet, want den paeys anders niet in en hielt dan te stellene dye gouden croonen te.xxx.stuuers, ende al ander gout in aduenante, ende van tselueren ghelt in sghelijcx tot.ijc.mijlen varre int ronde. Ende versochten te hebbene een copye van den paeyse, omme dat si hem te bedt wachten souden moghen den paeys in eenegher manieren te brekene. Ende oock waren dye van Ghendt wel blijde dat wi alsoo ghedisponeirt waren ende van eenen accoorde, ten oorbore van onsen prinche ende van sijnen lande. Ende dese antwoorde hebbende mijn here van Nassauwe ende mijn heere vanden Gruythuyse, saghen vreimdelic vp malcanderen ende verwonderden seere van desen accoorde, ende sonden alle die garnisoenen weder omme elc vp sijnen leghere. Ende den heeren was ghebeden dat si tgarnisoen van Damme souden doen vertrecken, twelc dye heren noch niet en deden, ghemerct dat wi van Brugghe tghelt niet of stellen en wilden, maer al hadde tghelt of ghestelt gheweist, sy en souden noch niet vertrocken hebben, want sy van Damme laghen en proncten yegens mer Phelips van Rauesteyn, omme te siene wiere voren toe tasten soude omme den paeys te brekene. Ende weit dat dye Deynen doe waren met die van Brugghe, Ghendt ende Sluys, ende nyement anders en hadden die van Brugghe te vriende dan die croone van Vranckerijcke, daer si huer hope vp stellen mochten dat sijse niet laten en souden, want sijt voor den paeys wel betoocht hadden. Ende die voorseyde heren versochten aen die van Ipre ooc dat si tghelt of stellen souden naer den cours alsoot in Brabant ghinc, twelc si in gheender manieren consenteren en wilden, maer midts vrienden dye si binnen der stede hadden, daden den commuyne te verstane dat te Brugghe of ghestelt was, twelck nochtans lueghene was. Ende midts dier condicie bedroghen sijne, so steldent die van Ipre ooc of, in sulcker wijs alst die heren begeerden. Ende corts daer naer versochten sijt weder aen dye van Brugge, vraghende waer omme sijt niet also wel en daden als die van Ipre, wantet die also of ghestelt hadden, maer die van Brugge en wildens niet consenteren dan inder manieren voorseyde.
¶ Item es te wetene dat vp den bandach daer hier voren of ghesproken es, als den Inghelsman ghebannen was, soe waren noch ghebannen eenen Adriaen floreins, die daer te voren in die orloghe roode Roe was binnen Brugghe, ende ooc een buersemakere, die welcke grote aliancie metten voorseyde Inghelsman ghehadt hadden, ende seere partijich gheweist yeghen den Roomschen coninc etc.
Auteursrechtvrij