[Item achteruolghende vp den eersten dach van Sporcle]
Item achteruolghende vp den eersten dach van Sporcle, so dede den hertoghe van Zassen een vraghe voor tcommuyn van Brugge, of si hem houden wilden aen den paeys van Tours, daer toe dat si alle seyden iaesy. Ende hi seyde inder ghelijcke dat hijs ooc houden wilde, ende hem lieden vergaf wat si eyghen den.coninck.vanden Romeynen of yeghens hem mesdaen hadden. Ende dede als doe een ghebodt ten Damme, ende gaf doe ooc te kennene dat sijnen sone doot bleeft int assault voor den Damme, twelc hi hem lieden ooc vergaf, ende dat si voort aen goede kinderen souden blijuen. Ende leyde van sijnen garnisoen binnen Damme, omme die stede van Brugge mede te dwinghene, als ghi hier naer noch hooren sult, ende hadde gheerne ooc met vele volcx binnen der stede vander Sluys gheweist, maer mer Phelips van Rauesteyn en wildet hem nyet consenteren dan met sijnen state.xl.mannen ende niet meer. Ende aldus quam hi weder te Brugghe, want dye van Ghendt ende dye vander Sluys warens eens, want die Wet en was als doe noch niet vermaect.
¶ Item vp onser vrauwen dach Lichtmesse quam den hertoge van Zassen vanden Damme te Brugghe, ende daer was hem eedt ghedaen vander wet, Dekenen ende hooftmannen, die als doe nyeuwe vermaect waren huyter name vanden Roomschen coninck als regent van Vlaendren.
¶ Item die nyeu wethouders ende officiers stelden dicwijle voort datmen tghelt ten derden of stellen soude, te wetene dye stuuers vanden ouden hertoge Phelips, ende den dobbelen met.ij.leeuwen.ij.oude placken. Ende in sghelijcx het gouden ghelt in aduenante, te wetene den gouden Andries gulden te.xl.groten, ende al ander gout also achteruolgende, also wel Hertoge Karels munte als andere, ende alle die munte vanden.Coninc.van Vranckerijcke bilgoen. Het welcke vele onderlinghe seyden dattet noeyt ghesien en was, in welcker maniere dattet eerst of gestelt was in Brabant in sommeghe steden, ende daer naer te Bruessele, te Cortrijcke, Toudenaerde, te Rijssele, te Burburch, ter Nyeupoort, te Greuelinghe, ende ooc in Hollant, ende in Zeelant, ende Henegauwe, te Duynkercke, ende te Dixmude. Ende aldus bleeft staende dattet nyement vanden.iij.steden doen en wilden tot meye. Ende binnen der middelen tijt so steldent die van ghent of ten haluen, ende so bleeft staende als voorseyde es.
¶ Item naer half vastene int iaer.lxxxix.vp den bandach, soe was ghebannen den Inghelschen capiteyn die welcke dye stede van Brugghe wel ghedient hadde in die tijt voorleden, maer omme dat hi hem veruoordert hadde eeneghe duytschen dye vanden Damme quamen vp sijn verweeren te beuechtene, ter cause van eenege verwijtinge dye si malcanderen deden wort ghebannen, waer of grote beroerte quam binnen Brugge, want dye voorseyde Inghelsman veruoorderde hem te commene corts daer naer inden Burch, midts eenege die hi hadde tsijnder hulpe, ende meende hem te wrekene vp die ghene die hem ghebannen hadden. Ende als doe was Burchmeestere vanden Courpse meester Pieter dye witte, die corts ghecommen was huyt Inghelant, dye als doe inden burch so ghequetst wiert dat hy corts daer naer vander quetsuere starf. Ende in sijne stede was Burchmeester ghemaect Ioos van wulfsberghe. Ende desen voorseyde Inghelschen capiteyn inden burch commende hadde versocht sercours aen den Deken vanden smeden, ende aen die wapemakers, onder al so warer vi.of.viij.die hem bi vielen, daer mede dat hi inden burch quam, wel meenende mijn here van den gruythuyse ende die wet te beschamene. Ende wiert slaende inden hoop so datter ommer een doot bleef, ende was een vuldere, ende een
Auteursrechtvrij