Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item dient ooc ghenoteirt dattet te diere tijt was een seere grote dierste van allen goeden]

Item dient ooc ghenoteirt dattet te diere tijt was een seere grote dierste van allen goeden, want men cochte een hoet tarwe wel.xxiiij.schellingen groten, een werm schoudere.iiij.schellingen groten, eenen cappoen.v.schellingen, een kiekene.xx.groten, een lampereel.ij.schellingen groten, een haentvoghele.ij.schellingen groten, een.xxv.eyeren.xiiij.groten, een pont bueters.xvi.groten, een libra vlaems caes.iij.groten, een libra Inghels caes.v.groten, een cleen schape caes van.ij.libra.xij.groten, een voer houts.vij.of.viij.schellingen, een last turuen een libra groten, ende alle ander dinghen in aduenante waren soe ontraetgieuselicke diere, dat nyement wie hi was en conste huys ghehouden. Men cochte eenen stoop Rijnsch wijns.xxviij.of.xxx.groten, ende eenen stoop petaus.xx.groten, ende den rooden wijn in sghelijcx, so dat vele lieden ghenouch van aermoede ende van ghebreke storuen ende tvolcwiert al aerm ende bijstier duer den scherpen tijt als voorseyde es.

[Vp den.xxvi.sten dach van Lauwe]

¶ Item vp den.xxvi.sten dach van Lauwe, so was tcommuyn van Brugge vergadert ten Freren, omme dieswille dat mijn here den hertoghe van Zassen begheerde in die stede te commene met also vele volcx alst hem gheliefde. Ende metsgaders dattet inden paeys ghesloten was datmen den Roomschen coninck of sijnen stedehoudere obedieren soude, so wast

[fol. CC.lxiiij.r]

gheconsenteirt, ende quam ter smede poorte inne ghewapender hant met vele volcx, maer si en deden gheene ruytheyt. Ende die vander wet vander stede hadden hem achter die Magdaleene omaedge ghedaen als behoorde. huyter name vanden coninc vanden Romeynen. Ende die voorseyde hertoge van Zassen die passeirde duer dye stede sonder yewers te lettene ofte beetene, tot dat hy wast met sijnen volck binnen der stede vanden Damme, twelck daer naer wel was ten groten grieue ende leede vander stede van Brugghe, als corts daer naer wel bleeck.