Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xix.sten dach vander maent van Meye.Anno.M.CCCC.ende.lxxxix.]

[Vp den.xix.sten dach vander maent van Meye.Anno.M.CCCC.ende.lxxxix]

Item vp den.xix.sten dach vander maent van Meye.Anno.M.CCCC.ende.lxxxix.so deden die vrylaten monstre buyten Brugghe achter die magdaleene, ten.viij.hueren voor die noene, omme te treckene met die van Brugge in twestlant, te wetene op Dixmude, Nieupoort Vuerne ende Greuelinghe, ende meer andere die contrarie die drie steden van Vlaendren waren. Ende dese steden ende casselryen hadden vernomen van deser vergaderinghe, ende maecten hem lieden sterc omme te commene achter die magdaleene, omme den voorseyde volcke een daroy te doene, ende omme die heeren van Brugghe te vanghen hadden si gheconnen, maer si sloughen faulte, want si quamen naer der noene, als die monsteringhe voor die noene ghedaen was. Aldus en vonden si daer nyement dan schamel lantsvolcxkin dat

[fol. CC.lxi.v]

ter stede waert quam met vytaelgie, het welcke si alle scutteden ende vinghen. Ende dus delaygierende, so vernamt het garnisoen van Oudenburch ende van Oostende, metsgaders tlantvolc dat int noortvrye vanden monstre thuys ghecommen was. Ende si versaemden ende wachtense int wederkeeren met al haerlieder gheuanghen, ende worden daer beuochten, ende een deel doot ghesleghen ende ook sommege gheuanghen, waer of dat eene was een inboorlinc van Brugghe, die welcke tsanderdaechs was gheleuert te Brugghe, al daer hi was onthooft vp den xxiij.sten dach van Meye, omme dat hi die schamele landtslieden gherooft ende vermoort hadde, ende vele crachts ende foortsen ghedaen. Ende bouen dien vele iniurien ende cleenicheyt gheseyt hadde vander stede van Brugghe, daer hi nochtans een ingheboren Brugghelinc was, ende vry vleeschauwere, ende Foreestier vanden steicspele van Brugghe.