Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den vierden dach van April]

Item vp den vierden dach van April, so trac mer Phelips van Rauesteyn metter compaengie te Bruessel waert, omme te halene die waghens daer si mede gheuytaelgiert hadden gheweist in haerlieder noot. Ende noch moestmense vp taelgieren, want si grooten noot hadden. Ende mer Phelips meende te begheerene aen die van Mechelen den graue Phelips, sone vanden coninc vanden Romeynen, om te brijnghene inden handen vanden.iij.leden slandts van Vlaendren, omme by dien te eer tot paeyse ende teenen goeden accoorde te gherakene. Ende waert bi al dien vp berieden hi soude pijnen te ghecrijghen, of het soude hem aen sijn macht ghebreken, ende ooc aen die macht vander croone van Vranckerijcke

¶ Item men seyde als doe dat die coninck van Vranckerijcke hadde ghemaect een bestant metten Bortoenen.iij.iaer lanc, ende dat hy selue in twestlandt commen soude metter macht, also ghinc die mare al tlant duere.