Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Voort vp den.xxiiij.sten dach van Octobre]

Voort vp den.xxiiij.sten dach van Octobre, so was ghesloten tusschen die van Brugge ende die vanden Noortvrye ende westvrye, omme penninghen te vindene ende te gheuene omme te treckene vp Dixmude ende Nyeupoort, ende haerlieder medepleghers of te worpene ende te castijdene alle die contrarie den lande sijn ende onsen natuerlicken prinche. Ende souden capiteyn maken mijn here Eueraert van Arenberghe of mijn here van Peenen of mijn here vanden Gruythuyse soudt selue doen met meer capiteynen, ende daer vp bleeft ghesloten. Ende del seluen dach verdroncken.iiij.huen, daer men seyde dat me ioncker van Breederoede in een was, maer men wist niet wel.

[Den vierden dach van Laumaent]

¶ Item vp den vierden dach van Laumaent soe was ghemaect capiteyn van Brugghe onsen Schouteetene, omme te treckene Toudenburch, daer bi hem lieden vergaderen souden die van Ghendt, ende dye van Cortrijcke, ende alle tlanstvolc vanden Noortvrye. Ende al daer Toudenburch maectemen.ij.blochuysen, omme daer mede te treckene voor Dixmude, ende men voerde mede allerhande artijlgerye der orloghe aengaende, ende dat ten coste van die van Brugghe ende die vanden Vryen, dye daer mede weltevreden waren.