Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.vi.sten dach van Laumaent]

[Item vp den.vi.sten dach van Laumaent en den.x.sten dach vander seluer maendt en den.xi.sten dach en xij.sten dach]

Item vp den.vi.sten dach van Laumaent, so quamen die van Ipre ende van Cortijcke bi die van Brugghe, die welcke laghen Toudenburch, daer si hem lieden verbeyden. Ende vertrocken van daer te samen ende ghinghen ligghen te Thorout, omme van daer te treckene naer Dixmude. Ende daer wesende tot den.x.sten dach vander seluer maendt, so quaman.vi^c.peerden ende.iiij^c.voetknechten Franchoysen met Anthoine danchy te Torout, ende vertrocken den.xi.sten dach bet naerdere Dixmude, so varre dat siden.xij.sten dach in namen tcasteel van Anchame, ende vinghen alle dye ghesellen diere vp waren, wel tot.xxiiij.toe, ende die grote en gienen quamen te watere van Ipre.

[Vp den.xvi.sten dach van Laumaent en den.xvij.sten dach vander maent.]

¶ Item vp den.xvi.sten dach van Laumaent, so souden vertrocken hebben dye grote engienen van Brugghe ende van Ghendt tot.vi.sticken toe, te weten sint Ioris, snelle, ende het grootste engien van ghendt, ende een grote serpentijne, ende noch.ij.grote serpentijnen van brugghe. Ende den seluen dach quam mijn heere van Meerwede met.x.hondert peerden ende met vi.hondert voetknechten, ende meende wel die engienen te schuttene, maer hi quam voor niet, want si en vertrocken niet voor den.xvij.sten dach vander maent. Ende omme dat hijse niet en vant, hy vinc die lieden ende slouchse doot tot Brugghe voor die poorte.