Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xi.sten en den.xij.sten en den.xiij.sten en den xx.sten dach van Ougst]

Item vp den.xi.sten dach van Ougst, was gheordonneirt ende ghesloten datmen trecken soude te Dixmude ende ter Nyeupoort, omme die te castyene, ende in te nemene, ende meer ander quaetwillende van andere smalle steden, ende trocken als doe huyt Brugghe.xvij^c.peerden, ende twee duysent voetknechten, ende ghinghen tsauents logieren Toudenburch, daer si noch vonden wel.vi.duyst voetvolcx huyten Noorden ende Westvrye. Ende trocken den.xij.sten dach voor by Dixmude ter Nieupoort waert, al daer commende ende nederslaende, so wast ghemaect een treue ende bestant van twee hueren, al daer die capiteynen spraken met dye vander nyeupoort. Ende sprekende te samen, so schoten die vander Nyen-

[fol. CC.lviij.r]

poort eenen quareel in tbeen van mijn heere van Spiers, om welcke quetsuere hi te Brugghe ghebrocht was omme dat te ghenesen, doe ghinc tvolc van orloghen ooc seere schieten. Ende die vander stede vrachten mijn here Phelips of hi hem lieden wilde nemen in gracien, behoudende lijf ende goet. Daer vp dat mer Phelips van Rauesteyn antwoorde, dat die drie leden slandts van Vlaendren consenteirden, hi wasser mede te vreden. Ende aldus daer liggende, verbeyden monsuer descordes, die quam vp den.xiij.sten dach van Ougst, ende si waren sterc metsgaders tvolck van mer Phelips van Rauesteyn wel.viij^m.mannen van wapenen, ende quamen int westlant. Ende monseur decordes was met veil volcx ende met groten engienen voor sinte wijnnocxberche, maer daer wordt ghetracteirt dat die van Berghen hem vpgauen, behouden lijf ende goet, waer of mijn heere van Meerwede die doe capiteyn van Berghen was, begeerde huyt te gane ende drie daghen respijt te hebben om tantwoorden, of hy metten hertoge Phelips wesen wilde of blijuen bi den Roomschen coninc, twelc hem gheconsenteirt was. Ende alser monseur descordes in quam, twelc was den.xx.sten dach in Ougst, doen track mijn heere van Meerwede terstont te Burburch binnen, ende dede dye voorboughen of doen, ende wildet houden huyter name vanden coninck vanden Romeynen, want hy weder seyde monseur Descordes, ende al die aermeye. aldus was Berghen in ghenomen ten oorbore van onsen natuerlicken prinche. Ende daer was huyt gheroupen den paeys also hi te Brugge ghesloten was hier te voren.