Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dat skeysers volck, ende tvolc vanden Coninc tsamen een assaut daden vp den Damme, ende hoe sy daer of ghesleghen waren.

[Den.xviij.sten dach van Hoymaent]

ITem corts hier naer, den.xviij.sten dach van Hoymaent, so quam theyr vanden Keyser weder van Bouchoute, ende theyr vanden Roomschen Coninck ligghen weder Tardenburch, ende die Coninck lach te Middelburch, ende dreechden ons van Brugghe ende vanden Damme, ende vander Sluys alle te nieten te doen endete verderuene. Ende vp den nacht vanden.xviij.sten dach voorseyde, daden tvolc vanden Coninck, ende ooc van skeysers volc een assaut vp den Damme, ende meendent wel ghewonnen te hebbene, maer si lietender veel volcks, dye int beclemmen doot bleuen ende gheschoten waren vanden engienen vanden Damme, ende ooc in dye veste verdroncken, so dat si dye stede laten moesten. Ende daer bleuen ooc sommeghe heeren ende edele mannen, ende lieten daer al haer ghereeschepe die si met hem ghebrocht hadden, omme die stede vanden Damme te beclemmene.