Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Item vp den.xx.sten dach van Wedemaent]

¶ Item vp den.xx.sten dach van Wedemaent, hier te voren, so quam een man van wapenen bi laste van die van Dixmude te Brugghe,

want mijn here van Dixmude santene selue, omme dat die van Brugghe soude ghelieuen te seyndene.xl.of.l.mannen te peerde wel voorsien, omme dye stede van Dixmude te helpen bewarene huyter name van dye van Brugge, ende also ontboot hi in sghelijcx aen tcasteel ter Heye liggende bi Dixmude, als dat si vergaderen soude met die van Brugghe. Maer die vanden casteele begheerden, souden si yement seynden, si wilden hebben twee mannen van Dixmude van den rijcsten in ostaegien, alsoot ghebuerde, want hy sandse. Ende als tvolc van Brugge ende vanden Casteele quamen voor Dixmude so quam mijn here van Dixmude ende hiet hem lieden wellecomme, ende begheerde aen die vanden casteele sijne ostaegiers, dye si hem consenteirden terstont. Ende noch vraechde hi of si eedt doen wilden huyter name vanden hertoghe Phelips onsen natuerlicken prinche, ende als ondersaten van dye van Brugghe Dixmude ende al datter in was logierende wel ende ghetrauwelic te bewaren als huerlieder eyghen lijf, ende nam aldus orlof aen die van Brugghe, ende seyde beyt een lettel tijts ic gae mijn volc in ordonnancie stellen om hu lieden te ontfanghene ende in te latene Vanden welcken hy al contrarie dede, maer stelde sijn volc in ordonnancie, omme als dye van Brugghe in commen souden, hem lieden alle doot te slane ende te schietene, alsoo si

[fol. CC.lvij.r]

wel toochden, maer si waren te haestich vp haerlieder stick, want als ons volc voor die poorte quam om binnen te commene, soe schoten si eer si binnen der poorte waren een engien, van welcker schote drie leden van onsen volcke van Brugghe doot bleuen. Ende tvolck van Brugghe ersselden ende vloden tot vp tcasteel vander heye voorseyt. Also meende mijn heere van Dixmude dye van Brugghe te verrasschene, ende also te nieten te doene.