Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item theyr van den Keyser]

[Den eersten dach Hoymaent]

Item theyr van den Keyser ende vanden Roomsche coninck quamen wedere van Bouchoute ligghen Tardenburch, ende dye Roomsche coninck lach te Middelburch, ende die keyser quam ligghen ontrent Vynen. Ende die coninc sandt voor Brugghe van sijnen volcke ontrent.ij^c.mannen, ende die fransoysen slougen huyte, diese beuochten, ende en waren niet bouen.lx.peerden nochtans sloughen sijere een ghedeel doot, ende brochtender.vi.gheuanghen. Dit ghebuerde vp den laetsten dach van Wedemaent Ende dye duytschen commende in haerlieder heyr, waren seere verstoort, want hem lieden en quam gheen vitaelgie, ende si en aten anders niet dan vleesch sonder broot, ende loock ende radijs, ende en droncken niet dan watere, ende hadden si connen ghecrijghen een broot van xij mijten, si haddender wel voren ghegheuen xij.groten, ende die coninck vanden Romeynen en hadde gheen ghelt om sijn volck mede te betalene, so dat si omme tghebrec dat si daer leden, van hem vertrocken, ende en wilden daer niet blijuen wel tot twee duysent toe. Doe ghinc die coninck als hi dat sach, ende badt het remenant dat si bi hem blijuen wilden, hi soudse alle gadere rijcke maken eer den derden dach totter noene commen soude. Ende hi gaf ende abandoneirde dye stede vanden Damme die Ruyters voor haer propere goet, dat si daer assaut vp doen souden, ende pijnent te ghecrijghene, den eersten dach Hoymaent, ende si maecten haere ghereeschepe vp den seluen nacht voor den dach om te commene, maer men hilt soe scherpe wake ten Damme dat si niet en dursten commen, want si saghen die vanden Damme vieren, ende si hadden die mare dat die van Brugge huyt quamen metten fransoysen, ende die vanden Damme ende die vander sluys in sghelijcx, om den Coninc vp te slane. Ende die coninc dit verhoorende, trac haestelic met al sijnen volcke ende met sijne ghereeschepe byden Keyser sijnen vader ende som van sijnen volcke bleef te Middelburch, ende daer cochten si een broot van.xij mijten.iiij.groten, ende eb constens noch niet ghenouch ghecrijghen, want het diersde van huere te huere.