Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.xxiij.sten dach van Wedemaent]

Item den.xxiij.sten dach van Wedemaent, so quam mijn here van Fleters als capiteyn in Brugghe, ende dede eene coerse voor Middelburch, ende hadde met hem wel.xiiij^c.mannen, maer daer liepen der altijts meer toe, omme dat te helpene te nieten te doene. Ende voor Middelburch commende, si begonsten te stellene haerlieder engienen, maer die van Middelburch begonsten so veruaerlicken te schieten, so datter drie of vier doot bleuen van die van Brugghe Ende die capiteyn vant in sijnen raet dat hy van daer track voor Tcasteelkin van Cocxye buyten der sluys, twelcke si tsanderdaechs bestormden ende wonnen want sijt vp gauen, behoudende haerlieder lijf diere vp waren tot xxij.ghesellen, huyt ghedaen Rijcke de visch ende eeneghe dye van binnen den lande waren. Ende aldus sijnde hilden alle die gheuanghene bi hemlieden dien nacht, omme eerst te vergaderene die groote pilaedge die in Tcasteel was. Ende die van skeysers heyr hadden dye tijdinghe dat die van Brugghe huyt waren met simpelder ordonnancie, waer of was in theyr vanden Keyser een ghebodt ghedaen, so wie die van Brugge wilde vpslaen het soude al sijne behooren dat hi daer vercreghe, sonder yements yeghen segghen. Ende doe nam dat aen mijn here van Zonnenburch, ende quam terstont naer Middelburch, daer hi vernam waer den leghere van die van Brugghe lach, dye als noch laghen sonder ordonnancie tot smorghens den daghe toe

[fol. CC.lvi.r]

[Den.xxvij.sten dach van van Wedemaent]

Ende was den.xxvij.sten dach vander seluer maent van Wedemaent. Ende smorgens in die dageraet quam die voorseyde graue van Zonnenburch in ghesmackt met .x^c.peerden, ende wel.ij.duysent voetknechten, wel voor sien met pijcken, colueueren, ende hallebaerden, daer si grote moort daden, ende slougen der wel doot tot.iij.hondert of meer, ende haddender wel.vi.hondert gheuanghen, sonder eeneghe weere te biedene, want dye vianden waren hem lieden vp den hals eer dat sijt wisten of gheware worden, want dye acouters niet en acouten so si behoorden. Ende die capiteyn mijn here van Fleters was vanden eersten dyere gheuanghen was, ende dat dede dat tvolck niet te bestieren en was noch in ordonnancie te stellen, want die capiteyn mijn here van Fleters hadde gheerne tsauens toe voren thuys gheweist, maer die Deken vanden smeden ende die Deken van den vulders en wilden also niet gaen, noch oock Anthonis van Nyeuwenhoue, het en ware dat si den buytijnc al gheladen hadden, bi welcker ghiericheyt si alle verloren bleuen, vp den.xxvij.sten dach van Wedemaent. Ende waren alle die voorseyde gheuanghen gheuoert in theyr vanden Keysere, daer hi lach Teuerghem bi Ghendt, daer hem lieden vele spijteghe woorden gheseyt waren. Ende die Keyser begheerde aen den graue van Zonnenburch alle die gheuanghene te siene, ende ooc dye coninck vanden Romeynen, twelc also ghebuerde. Ende die gheuanghene moesten twee monsteren doen, deene voor den Keyser ende dandere voorden Coninck. Ende die keyser seyde tot eeneghe van den gheuanghene, ghi sult hijncken, ende tot andere ghi sult drijncken. Ende dye Keyser ende die coninc hadden gheerne alle dye gheuanghene ghecocht yeghens den here van Zonnenburch maer die heere antwoorde dat hijt niet doen en wilde om sijnen laetste man te verliesene, want hi hadde hem lieden haer lijf toe gheseyt, ende dat en wilde hi niet weder trecken, ende hi meendese Ruytersche wijse ten rentsoene te stellene. Waer of dat mijn heere van Fleters Capiteyn als voren ende die Deken vanden smeden ordonneirden een ander maniere, als dat sy een generael rentsoen souden maken, want die Capiteyn mijn heere van Fleters meendet wel te ghecrijghene vp die ghene die vander stede wech gheloopen waren, van haerlieder goedinghen, ende ooc van sommeghe lantslieden. Ende alle die gheuangenen consenteirden dat so ghebueren soude, ende ordonneirden.xij.mannen die metten capiteyn trecken souden omme trentsoen, het welcke drouch in tgheheele die somme van drie en vichtich duysent guldenen, elcken gulden weerdich sijnde.xliij.stuuers. Ende die gheuanghen stelden haer lijf te pande voor den capiteyn, ende alle die met hen reden te Brugghe omme trentsoen voorseyde. Ende hadde weder omme belooft binnen achte daghen int heyr vanden keyser te sijne. Ende desen eedt was principalick ghedaen te Euerghem, daer alle dye gheuanghenen laghen, waer of dat mijn heere van Fleters daer gheerne eer hadde gheweist, metsgaders dat hi die penninghen nyet ghecrijghen en conste. Maer die van Brugghe en wilden hem daer niet weder laten keeren, omme dat die somme so seere groot was. Waer omme hi voor hem nam te treckene ten Damme, ende van daer voort om sijne belofte te vulcommen. Twelcke die van Brugghe vernamen, ende sonden haestelicken ten Damme waert, datmen mijn heere van Fleters ten damme niet inne laten en soude, noch duere passeren. Ende mijn here van Fleters commende ten Damme, hi wilder ommer inne wesen. Ende die capiteyn van den Damme seyde dat hijere niet inne en soude, ten ware bi laste van die van Brugge, waer omme hy den capiteyn vanden Damme vele quade woorden gaf. Ende aldus daer ghearresteirt wesende, so quam mijn heere van Peenen, dye welcke binnen der tijt dat mijn heere van Fleters gheuanghen was te Euerghem, ghecommen was te Brugghe met vele fransoysen, daer hy vpper Capiteyn of was, ende mijn here van Peenen vinck selue mijn here van Fleters noch, omme trensoen van dat hi te Bethune gheuanghen was, twelck hi noch niet betaelt en hadde, ende daer mede was belet dat hy sijn woort niet houden en mochte so hi belooft hadde. Maer binnen.vi.of.vij.dagen daer naer so wast gheconsenteirt dat hy met den sijnen haerlieder belofte souden gaen doen alsoot

[fol. CC.lvi.v]

ghebuerde. Ende commende te Euerghem, so hadde dye Keyser ende die Coninck vanden Romeynen tgheheele heyr van beeden sijden vp ghebroken, ende ghedaen vertrecken, ende waren neder ghesleghen te Bouchoute. Ende mijn here van Fletren dit beuindende, was seer blijde, want hi daer sijn belofte vulquam sonder yements cost of last, ende trac van daer te Ghendt bi mer Phelips van Rauesteyn, verclarende hem die saken. Ende dit verhorende mijn here van Zonnenburch, was seer gram, nochtans stelde hi ende dede stellen die scamele ghesellen vp so ghenadich rentsoen, als dat si hem van hem ende van sijnen volcke beloofden.