[Item vp den.xviij.sten dach van Wedemaent en derden dach van Hoymaent]
Item vp den.xviij.sten dach van Wedemaent, so wasser een scheppere wonachtich by sint Saluators kercke neffens den teyms, dye hem veruoorderde dye duere bouen vp die halle in sticken te slane, ende liep bouen ende slouch dye clocke aen een boort, ende stelde daer mede die gheheele stede in roere, want tvolc liep al in die wapene ende quamen ter marct. Voort soe veruoorderde hem die selue scheppere te halene huyt sijnen huyse den vpper Burchmeestere Ioos die deckere, ende leeden bouen vp die halle, ende riep luyde tot den volcke dat daer vp die marct ghecommen was, midts dat hy die clocke ghesleghen hadde, of hy hem daer langhe alleene vinden soude, ende gheen gheselscap hebben. Ende riep noch tot eeneghe comt bouen wi sullen goede chiere maken, ick weeter noch al vele meer die van dese broede sijn, ende hy seyde den Burchmeester vele vylonyen aen, ende wilden ter veynsteren huyt worpen vp die marct. Ende daer waren eeneghe vp die marckt die hem ghelijc gauen, ende seyden het es nv tijt dat elc sijnen doot slae, ende dat was een out man een cupere. Ende om dit sware stic ende grote vreese ende dangier dat hier in gheleghen was, was tvolck seere beroert, want twas omme tvolc malcanderen doot te slane ghelijc beesten, ten hadde gods gracie ghedaen. Ende die Burchmeestere was van eenege discrete mannen thuys gheleet. Ende tsanderdaechs men beuant dat die voorseyde sceppere dat ghedaen hadde bi foortsen ende huyt eenen quaden wille huyt sijnen eyghenen hoofde, ende dat hijt dede omme een beroerte te makene binnen der stede. om twelcke dat hi gheuanghen was ende gheleet vp den steen, ende was ter vierscare ghebrocht vp den derden dach van Hoymaent, ende was al daer verwesen vanden leuenden lijue ter doot ghebrocht te sijne metten sweerde, als hi was, ende was vp den voorseyde dach onthooft.
Auteursrechtvrij