den Romeynen die eenege vander stadt hem heymelic belooft hadden te seyndene ende te leenene. Ende byder vergaderijnghe beuant men datter was een saufconduyt van.viij.daghen, waer of dat die wet noch tcommuyn nyet en wisten. Ende dit aldus wetende, liepen den seluen dach weder in die wapene, ende begheerden te wetene wie dat Saufconduyt begheert hadde vanden Keysere, dye welcke voor ghendt lach met sijnder macht van welcken sauueconduyte hem lieden die van der wet seere excuseirden dat sy daer nyet of en wisten. Ende om dat discoort ter neder te legghene ende te laten wesene in sijnen staet, so was ter hallen huyt gheroupen, alle die ghene die ghewillich waren haren natuerlicken here ende prinche den hertoge Phelips, dat si hem tsachternoens ten een hueren ghereet souden vinden omme te treckene vp Middelburch, alsoot ghebuerde, want daer quamen ende waren vergadert wel.iiij.duysent mannen, maer si en trocken niet vardere dan ten Leestkine, al daer si tvier in staken, ende vinghen den capiteyn, ende brochten alle die prijsen met hem lieden te Brugghe. Ende den lieden van Ghendt was ouerghedreghen dat wi van Brugghe gheheel ende al van hem lieden ghescheeden waren. Twelc wel contrarie bleec byder entreprijse vanden leestkijne als voorseyde es het welcke deerlic ende claghelic was.
¶ Voort vp den.xi.sten dach van Wedemaent so trocken die capiteynen van Brugghe met vic.ghesellen te Oudenburch waert, omme te bewarene.xx.waghenen met coorne, die welcke si brochten te Brugge vp den voorseyde dach snachts, ontrent den.xi.hueren inden nacht.
Auteursrechtvrij