Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.ix.sten dach van Wedemaent]

Item vp den.ix.sten dach van Wedemaent, so was een vergaderinge ghemaect om met mijn here van Vleters als capiteyn van Brugghe, om te trecken voor tcasteelkin van Brootseynde omme dat of te worpene ende te nieten te doene. Ende daer commende schoten twee schoten dat vp met twee serpentijnen, ende roofden alle dye peerden ende coeyen die vp tneirhof waren, ende quamen also weder te Brugge, metten rooue Ende te Brugghe sijnde, trac terstont weder omme met meer volcx voor tvoorseyde Tcasteel van Brootseynde, waer of die Ruyters vanden casteele verwondert waren, siende al dat volc dat daer ontrent was. Ende vonden in hueren Raet, dat sijt vpgauen sonder slach of stoot behouden haerlieder lijf, huyteghedaen twee Ghijden die vander prochie van Malleghem gheboren waren, die waren met den butijnc ghebrocht te Brugge, ende daer onthooft als verraders vanden lande, ende contrarie haren natuerlicken heere ende prinche den hertoghe Phelips.