Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den viij.sten dach van Wedemaent]

Item voort vp den viij.sten dach van Wedemaent, so quamen iiijc.waghenen met vitaelie, ende hadden met hem lieden staet vanden Keyser, wel tot iij^c.peerden, ende iij^c.voetknechten, al te samen omme te commene int heyr vanden Keysere, twelcke lach te Euerghem by Ghendt. Die van Ghendt wierdens gheware, ende waren daer of gheaduerteirt, als dat si sulcken daghe ende tsulcker plecke passeren souden. Ende die van Gendt trocken yeghens hem lieden ende beuochtense, ende sloughen al tpeerde volck doot, ende vinghen meest al tvoetvolc, ende pilgierden ende namen alle die vitaelie, ende oock ooc die waghenen die voor mochten, ende dye waghens die niet volghen en mochten die smeten si in sticken, ende die vaten metten wijne smeten si die boomen inne, ende staken die peerden ende meryen doot, so datter lettel of gheene van dyen volcke en ontghinc, want god was hem lieden yeghen so ons dochte.