Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.vij.sten en x.sten dach van Wedemaent]

Item vp den.vij.sten dach van Wedemaent, so wast dat Deyse met grote verraderye ghewonnen was vanden Keyser, want die heeren vande stede gauent hem ouere, ende lieten hem met sijnen volcke daer inne, dat het ghemeene volck niet en wiste. Ende als tghemeen volc gheware wiert vanden volcke van wapenen, si liepen ouer die selue sijde daer die vianden laghen, ende vluchten in die schepen vanden volcke, ende die vianden slougense doot die si ghecrijghen consten. Ende die princepale van dien ouergheuene was mijn here van Meulenbeke. dat ghedaen hebbende, ghinc alle sijn ondersaten vanghen, ende verbarnde haerlieder huysen, ende vermoorde tvolc. Ende dat meer es, hi verbarnde sijn eyghen dorp ende prochie, ende begonste te verbarnen Lichteruelde, ende hi beroofdet den.x.sten dach van Wedemaent, ende verbarnde meer andere dorpen vp den seluen dach.