Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Den eersten dach van Wedemaent]

[Item soe ghebuerdet noch, ende dit was vp den eersten dach van Wedemaent]

Item soe ghebuerdet noch, ende dit was vp den eersten dach van Wedemaent dat quam tgarnisoen datter lach te Middelburch te Brugge voor dye poorte tot aen die barriere, seggende dat si vrienden waren, ende vanden volcke van mijn here van Merwede, ende quamen so si hem ghelieten om in die stede te commene. Ende aldus sprekende yeghen tvolc, sagen haren slach datter een man stont buyten der cruyspoorte vp die Brugghe byder barriere, si reden naer hem ende reden hem in die veste, ende ouer die brugge sijnse, riepen wel luyde dat si waren volc vanden coninc, ende vergaderden terstont bi een wel.xl.peerden, ende veil voetknechten, ende hadden by hem lieden vele gheuanghene, ende vele buytijncx die si weder vp een nieu gherooft hadden. Ende namen eenen waghene met.ij.meryen, dat vp dat si die gheuanghen ghebonden leyden, ende voerdense met hem lieden te Middelburch, ende men seyde dat dien roof die si doe haelden wel weert was.iiij^c.libra groten.

[Den.ij.sten dach van Wedemaent]

¶ Item vp den.ij.sten dach van Wedemaent so dede Denijs metteneye sijnen boogaert voor die cruyspoorte of hauwen, ende men vellede naer dien alle die boomen die ontrent der stede stonden, omme datmen die vyanden te bet soude sien ende moghen beschieten met den engienen vander stede. Want soomen seyde die Keyser ende den coninc vanden Romeynen hadden ghesworen dat si Ghendt, Brugge, ende Ipre te nieten souden doen, ende insghelijcx Bruessele, ende dese steden souden sy alle doen te viere ende te sweerde. Waer vp datmen Raet hilt te Ghendt, met mer Phelips van Rauesteyn ende alle die heeren vanden lande. Ende ordonneirden eene Cruysvaert vp den Keysere ende vp den Coninck sijnen sone, aenghesien sijnder beloften dye hy ghedaen hadde, ende weder ghebroken,

[fol. CC.liiij.v]

sonder redene of recht contrarie god ende sijnen heleghen, want hi en recompense vanden paeyse ontfanghen hadde terstont wel hondert duysent guldenen, waer of dat hem niet meer belooft en was dan vichtich duysent. Maer als hy die heren buyten der stede van Brugghe hadde, so seyde hy, ghi heren ick dancke hu van huwer goeder visitacie die ghi mi ghedaen hebt als hu lieder ghearresteerde man, maer nv ben ic vp mijn voeten ende ghy sijt mijne gheuanghene nu, of ten sy dat ghy my noch.L.duysent doet hebben terstont, het welcke si hem beloofden te bringhene metten anderen. Ende hy dede nochtans contrarie sijnder belofte, ende den paeys die hi besworen hadde. Ende die mare ghinc dat den keysere Frederic sijnen vadere vele quaets volcx met hem hadde, omme tlant met te meerder ongenadichede te nieuten te doene, daer hy gheen recht noch redene toe en hadde, noch dye coninck sijnen sonde mede.