Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item te dien eynde dat alle die voorseyde saken ghestandich ende gheduerich moghen blijuen]

[Den.xij.sten dach van Meye. Int iaer ons heren.M.CCCC.ende lxxxviij]

Item te dien eynde dat alle die voorseyde saken ghestandich ende gheduerich moghen blijuen, so hebben wi desen paeys, alyanchie ende eewege intelligencie gheuasticht elc bysondere by sijnen eede, ende ghesworen vp dye heleghe Euangelie gods die te onderhoudene, sonder daer yegens yet te commene, noch van elck andere te scheedene. Ende waert dat yement faeytelic schiede of bi eeneghe weghen scheeden moeste, so en sal daer omme den seluen paeys ende alianchie niet verstaen sijn gheinfringiert ofte in ghebroken sijnde, ne maer sal altoos blijuen in viguere. Ende hebben gheordonneirt dat alle officiers ende wethouders in elc lant, ten aen commene van hueren officie expresselic belouen ende sweeren sullen den seluen paeys ende alianchie te onderhouden, sonder in eenegher manieren daer yeghens te commene, onder tdecksel van iusticien of andersins, in wat manieren dattet sy. Ende waert datter yement yeghens quame, dat sullen wy met den heren vanden bloede inder manieren ende naer thuytwijsen vanden artijculen bouen verclaerst wederstaen ten ghemeenen coste, het sy by iusticien of by faeyte, also die materien daer toe ghedisponeirt sullen wesen. Ende noch in meerdere, ende te dien eynde dat eewege memorie hier of si, so heift elck onser dese brieuen beseghelt met sijnen seghele huythanghende, ende hebben ghebeden in alder onderdanichede den seere hooghe ende moghende prinche den Coninc van Vranckerijcke, als naeste ende baerblijckenste oyr van onsen natuerlicken prinche, ter cause vander coninghinne sustere van onsen prinche, dat sijnder princelicker ghenade ghelieue te confirmeirene, ratifierene, ende corborerene den voorseyde paeys ende alianchie met sijnen groten seghele, ende ons te helpen wederstaen met foortsen, als die materie begheeren sal, ende punieren die infractuers van dien bi iusticien ende lemyten van sijnen Conincrijcke. Hebben voort ghebeden dye andere mijn heren vanden bloede. Te wetene eerweerdich vader in gode Dauid bisschop van Hutrecht, Ian hertoge van Borbon Conincstable van Vranckerijcke, Ian hertoghe van Cleuen, Ian here van Beanyen graue van Cleirmont, mijn here Adolf van Cleuen ende vander maercke heere van Rauesteyn, mer Phelips van Cleuen here van Wijnghendale, Anthonis bastaert van Bourgoengien graue van Roche in Ardanen, Phelips van Bourgoengien here van Beueren, Lodewijc van Brugghe here vanden Gruythuyse graue van Wijnczestre, als vrienden ende maghen van onsen gheduchten ende natuerlicken heere vander moederlicker sijde, daen of dye voorseyde landen ghecommen sijn, dat

[fol. CC.xlix.r]

sy in approbacien ende meerder versekerthede van al dat voorseyde es, huere seghelen hier aen willen hanghen metten onsen. Ende wi Chaerles metter gracien gods coninc van Vranckerijcke ouermerckende dye grote duecht ende weluaert die onse voorseyde broedere ende onsen neue, ende sijne voorseyde landen ende ondersaten gheschepen es te commene byden voorseyde paeys, ende alianchie hebbe ter bede vanden voorseyde staten dese brieuen ghesegelt met onsen seghele huythanghende, belouende als coninc die te onderhoudene, ende alle transgressuers van dier te punierene als voorseyde es. Ende in sghelijcx wi Dauid bisschop van Hutrecht, ende Ian hertoge van Borbon.etc. siende dat in desen goddelicken paeyse grote duecht gheleghen es als bouen, hebben wi ghesworen ende belouen, ende by desen belouen ende sweeren in alle dese voorseyde sticken ons te voughene metten voorseyde staten ende landen, ende al te doene dat wi als vrienden ende maghen vanden hertoghe Phelips behooren ende schuldich sijn van doene, omme tonderhouden van dien in kennessen onse seghelen hier aen ghehanghen. Ende es gheseyt ende ghesloten dat in desen paeys ende alianchie begrepen sullen wesen die andere landen van onsen natuerlicken here ende Prinche, dye welcke nyet present gheweist en hebben, in dese yegenwoordeghe vereenichede. Ende in sghelijcx die van Luycke, ende die vander stede ende sticht van Hutrecht, ende andere na ghebueren, vp dat hem lieden belieft. Ende omme die versekerthede van deser alianchie nopende die niet present gheweist en hebben, ende in die voorseyde alyanchie begrepen sullen willen sijn, worden ghehouden dat te declareirene bi hueren opene brieuen, met hueren seghelen van verbande, die si brijnghen sullen den staten daer si vergadert worden vp dattet hem lieden ghelieft. Ende al waert so dat eeneghe seghels bi verswijmthede, delaye of weygherijnghe van yemende hier aen niet ghehanghen en worde, nochtans sal dye selue alyanchie ende vnye in huer viguer ende foortse blijuen. dit was aldus ghesloten ende ghedaen te Gendt in onse vergaderinghe, den.xij.sten dach van Meye. Int iaer ons heren.M.CCCC.ende lxxxviij.

¶ Ende omme dat een yeghelic weten soude dye voorscreuene duechdelicke alyanchie, bi alle den landen ghesloten, so hebben Scepenen van beede die bancken van Ghendt dyt ghescrifte ghedaen stellen in prenten. Ende es dese voorseyde alyanchie ende eendrachtichede gheteekent, eerst huyter name vanden coninck vanden Romeynen, byder handt van mer Ian vander bouuerye heere van Wyere ende van Longlosse, ende mer Ian van Nyeuwenhoue Ruddere, ghedeputeirt. Voort huyter name van mijn heere van Rauesteyn, mer Phelips van Cleuen here van Wijnghendale, ende mijn heere van Beuere als vanden bloede, by mer Lodewijck van Praet here van Eluerdijnghe Ruddere, Anthonis vander fonteyne schiltknape, ende mer Daneel van heerzeele heere van Lielare Ruddere, huere ghedeputeirde.

¶ Item huyter name vanden staten van Brabant byder hant van Goossin van Hecke, Secretaris van Bruessele. Item vanden Graefschepe van Vlaendren, Ian Ysengien Wouter soete, beyts, Ian coene, Ian le fransoys vaquiere Ian meere, Ian wijnt, Ian de visch, Vincent van der brugghe. Item van den Graefschepe van Henegauwe, Wandaert herwij. Vanden Graefscepe van Zeelant, Lowijs boom Ian danckaerts sone, Pieter de graue. Item van tgraefschip van Namen, I        lodeuoet.etc.