Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item es voort gheaduiseirt ende ghesloten]

Item es voort gheaduiseirt ende ghesloten, omme die grote ongereghelthede dye es in dye munte, datmen gheduerende die onbeiaerthede van onsen prinche ende natuerlicken here slaen ende formeren sal eene ghemeen munte binnen den voorseyde lande, byder auctoriteyt als bouen, by aduijse ende ouer een draghene vanden meesters vander munte, ende werclieden hem dies verstaende, ende vp sulcken voet alsmen omme den meesten orboor ordonneren sal. Den welcken voet men niet en sal moghen argheren noch veranderen, noch den prijs vanden penninghen hooghen noch neirderen, sonder consent vanden ghemeenen landen. Ende men sal van nv voort aen munten vp den kethele, ende niet vp boeten of peynen van ghelde, ende in al volghen die preuilegien vanden seluen landen.

¶ Item hebben voort belooft ende al noch belouen dat ne gheen van ons van nv voort aen, ne gheene orloghe aen nemen en sal yegens wie dattet sy, sonder eerst daer vp vergadert te hebbene alle die voornomde staten Ende so wanneer by ghemeenen accoorde orloghe aen ghenomen wort, soe en salmen daer of gheenen paeys moghen maken sonder eendrachtich consent van alle die landen voorseyde

¶ Item hebben voort belooft, ende belouen elc in tsijne ende also varre alst hem aengaet te onderhoudene en te vulcommene alle goede trayctieten ende paeysen, accoorden ende eendrachticheden, ende alianchien, dye voortijts tusschen die voorseyde landen ofte eeneghe van dien ghemaect hebben gheweist. Ende es ons verstaen dat met deser nyeuwer intelligencie alle die voorseyde tractieten versterct ende ghecorroboreirt sijn.

[Den eersten dach van Octobre anno.lxxxix]

¶ Item ende te dien eynde dat alle die voorseyde saken te bet beleet moghen sijn ten meesten orbore ende profijte van onsen voorseyde gheduchten here, ende weluaert van sijnen landen, ende te belettene alle nieuwigheden diemen in preiudicien van dien soude moghen doen, so hebben wi gheaduiseirt ende ghesloten, aduiseren ende sluyten, dat nv voort aen die staten van alle dye voorseyde landen vergaderen sullen eens des iaers. Te wetene telcken eersten daghe van Octobre, in eenege vanden steden des lants van Brabant, Vlaendren ofte Henegauwe, sonder datmen die selue vergaderinge sal moghen houden twee waruen deen naer dandere in een lant, gheduerende die onbeiaerthede van onsen natuerlicken heere ende Prinche. Tot welcker plecken alle die voorseyde landen sullen ghehouden worden te seyndene haerlieder ghedeputeirde sonder eenich bescrijuen, die welcke last hebben sullen tontfanghene alle manieren van clachten der generalicheyt vanden voorseyde landen aengaende, omme byden officiers ende wethouders vanden seluen plecken daer die ghebreken ghebuert sullen sijn, terstont volgende hare vryheden ende preuilegien ende goede costumen gheremediert te sijne, ofte by haerlieder faulte daer inne voorsien te wordene by mijne voorseyde

[fol. CC.xlviij.v]

heren vanden bloede ende vanden staten te gadere. Ende voor die eerste dachuaert so es ghesloten die te houden binnen der stadt van Bruessele, ten eersten daghe van Octobre nv eerst commende. In dit iaer.xiiij^c.ende.lxxxviij. Ende dandere daer naer, den eersten dach van Octobre anno.lxxxix.binnen der stede van Ghendt. Ende die derde sal ligghen int Iaer xc. te Berghen in Henegauwe, ofte tot sulcker plaetse binnen den seluen lande, als die staten dat sluyten ende ordonneren sullen.

¶ Item ende want als eenen yegelicken blijckelic es, aensiende dat die ghebreke, dat die electien die ghedaen worden den prelaturen vanden cloosters, ende ander collegiale kercken in die voorseyde landen, gheen stede noch executie en hebben naer die ghescreuene rechten, maer byden reseruacien generale ende speciale vanden stoele van Roome, somtijts vanden seluen prelaturen ghedisponeirt wort in commanden, of andersins ghegheuen vreimde lieden, dye die selue prelaturen niet en besitten of bedienen, inden handen vanden welcken die selue prelaturen ende godshuysen, dien die selue plaetsen van rechts weghe beuolen sijn te regierene, alle gadere te nyeten gaen, ende godsdienst bi dien vermindert wort ter groter confusie ende schande vanden voorseyde landen, so sluyten wi, dat wi achteruolgende tpreuilegie generael van alle den landen die hant daer aen houden sullen, dat alle die electien ghedaen byden ghenen diet behoort, onderhouden sullen worden ende vaste blijuen. Ende alle commanden ende belastinghen van pencioenen of ander prouisien vanden prelaturen ghedaen teghen die selue electien wederstaen ghesaemder hant, sonder die te latene executie hebben in die selue landen naer onser macht ende mogentheyt.