Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hier nae volcht tinhouden vanden paeyse van woorde te woorde.

MAximiliaen by der gracien gods Coninck vanden Romeynen, doe te wetene alle denghenen dye nv sijn of naermaels wesen sullen, dat omme of te legghene, ende ten goddelicken ende duechdelicken paeyse te brijnghene alle sulcke gheschillen questien ende diuisien, als sichtent half Ougst herwaerts ghesproten onderhouden ende achteruolcht sijn gheweist tusschen ons ter eender sijde, ende den inghesetene van der stede van Ghendt, metsgaders den inghesetene van Brugghe ende van Ipre, adherende den voorseyde van ghendt, representerende tsamen die drie leden slants van Vlaendren ter andere diueersche com

[fol. CC.xlix.v]

municatie bi consente van ons ghehouden hebben gheweist, tusschen onsen schonen neue die here van Rauesteyn ende mer phelips sijnen sone, ende die here van Beuere ooc onsen neue, metsgaders den staten vanden landen, van Brabant, Henegauwe, Hollant, Zeelant, Nemen ter eender sijde, ende dye staten van Vlaendren ter andere, so varre dat bi middele ende tusschensprekene van eeneghe, ter eeren ende weerdicheyt van gode den vppersten coninc ende actuer van paeyse, compassie ende medelijden hebbende vp tverlies ende sturtinghe vanden kersten bloede, ende vp die grote schade ende interesten die byden voorseyde gheschillen ende diuisien claghelic ghesciet sijn, ende noch meer gheschepen waren te gheschiene, alle te laste ende achterdeele van onsen seere beminden sonde Phelips hertoge van Oostenrijcke, ende van sijne voorseyde landen ende ondersaten. Wie al die ghene die altijt meer ten paeyse sijn gheneghen gheweist dan andersins, hebben metten inghesetene ende ondersaten vanden lande ende graefschepe van Vlaendren, gheestelic ende weerlic eenen goeden vasten, ghestandeghen, eendrachteghen ende eeweghen paeys ghemaect ende vrede, midts sekere heerlicke openbare reparacien, die ons die vander stede van Brugghe ghedaen hebben, ende den pointen ende condicien hier naer volghende.