Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort so quamen te Brugghe.iijc.mannen van Gendt]

[Item voort so quamen te Brugghe.iijc.mannen van Gendt ende waren Colueueniers, ontrent den.v.hueren inden auent. Ende ten.vij.hueren inden auent so dedemen een ghebodt, dat alle die ghesellen van orloghen souden wesen ten viij.hueren vp die marct vp huerlider lijf, omme te treckene daer hem lieden den Capiteyn segghen soude, ende daer waren oock in ghecommen ontrent hondert peerden, te wetene fransoysen die oock mede in sghelijcx huyt trocken, maer ons volc track voren, ende en ghinghen maer tot Moerbeke brugghe, daer si vonden.vi.acouters van Ardenburch, die welcke schoten vp met eenen groten gheluyde, crijsschende ende roupende al ouer hoop, soe dat ons volc meende dat alle dye Hulstenaers daer gheweist hadden, ende keerden wedere metter vytaelgie die si te Middelburch gheuoert souden hebben, ende stonden voor dye poorte wel.ij.hueren eer datmense in liet, daeromme dat si wel gram waren, ende quamen so weder in die stede. Ende snuchtens quam den capiteyn van Middelburch, ende sijn volc, segghende dat sijt niet langher ghehouden en consten. Ende sanderdaechs ten een hueren naer die noene, so waren alle die ghesellen van orloghe ghestelt in ordonnancien, ende die van Ghendt, ende ooc die Fransoysen. Ende was omme dat si souden trecken naer Middelburch om tcasteel te vitaelgierene ende ontset te doene, maer dye fransoysen trocken weder te Ghendt waert, omme dat mense so langhe hadde laten staen voor die poorte, daer omme en wilden si met ons nyet vechten. Ende doe was ons volc ghesonden tsinte Michiels waert, twelc was van den brood. Ende daer sijnde, hoorden si dye mare van twee Acouters dye si vinghen, als dat mer Phelips van Rauesteyn hem lieden beuechten soude. Ende terstont ontrent den.viij.heuren inden auent, die Capiteyn ende dye ghesellen vanden Casteele van Middelburch lieden dye stede ende tcasteel staen sonder slach of sonder stoot, ende doen quam ons volc al van sinte Michiels weder in Brugghe. Ende den seluen dach was vp die marct ghemaect een galghe omme daer aen te hanghene die des verdienen souden, ende hueren Capiteyn nyet en souden willen obedieren.