Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item binnen den seluen daghe ende auent]

Item binnen den seluen daghe ende auent, soe schreef dye Coninck van den Romeynen eenen brief met sijnen hanteekene, daer aen ghestelt als dat die staten vanden vier landen souden commen ende vergaderen te Brugghe, hi soude den paeys confirmeren ende beseghelen, ende al sijne garnisoenen doen lichten, ende vertrecken huyten lande. Ende doen hoeptemen dattet al goet gheweist soude hebben, maer die meeninghe ende die woorden en waren niet van eenen accoorde, als corts daer naer bleeck.etc.      Nota.

[Den.viij.sten dach van Meye]

¶ Item vp den.viij.sten dach van Meye, so waren die voorseyde twee Acouters die gheuanghen waren te Brugghe vp dye marct ghehanghen, ende waren twee ghesellen van mijn heere van huytkercke, ende deen was gheheeten Cornelis ende dandere was gheheeten Adriaen.

¶ Item vp den.viij.sten dach van Meye, so sprac men weder vanden paeyse. Ende daer waren ghedeputeirde van Brugghe die te Ghendt laghen ende hadden vulle macht

[fol. CC.xlv.v]

ende last van onser stede van Brugghe, omme eenen generalen paeys te makene, waer of dat Ioos die deckere ons vpper Burchmeester van Brugghe een was, die welcke tusschen Brugghe ende Ghendt gheuanghen wort met meer andere wethouders vanden garnysoene van Ardenburch, ende met hem lieden was ooc gheuanghen Ian Derwijc. Ende doe quamen die vanden garnisoene van Ardenburch alle daghe voor die stede, ende vinghen ende vermoorden tvolck, ende men deder gheene weere yeghen dat dede tquaet regement vander stede, hoewel dat si nochtans garnisoen in hadden Ende hadden doe binnen der stede menich alaerme van quade straetmaren diere daghelicx ghesaeyt wierden, ende men liep dicwijls ter poorte ende ten mueren om dat men vreesde dat die vianden onse stede mochten stelen ofte in nemen by subtijlheden ende dye beroouen, ende daer en was dicwijls nyement.