Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item terstont daer naer warender gheordonneirt een duysent mannen]

Item terstont daer naer warender gheordonneirt een duysent mannen, ghecleet met peersch ende wit, omme te gaen treckene metten volcke van Ghendt ende metten Fransoysen, omme te beuechtene die duytschen, ende ander volck van wapenen van sconincx weghe, die welcke alle tquaet daden dat si consten ende mochten, ende waren huyt om ons te nyeuten te doene. Voort vp den.vi.sten dach van Meye, waren te Brugghe gheuanghen een man ende sijn wijf, die welcke gheseyt ende versiert hadden, als dat Cornelis van halewijn ghehadt soude hebben in sijn huys.xx.ghesellen, wel versien om een beroerte vp een huere te makene inde stede, het welcke besocht was ende contrarie beuonden. Ende waren daer omme ghebrocht vp tschauot, ende men souden den man den hals af ghehauwen hebben, maer hi hadde gracie, ende twijf moeste daer een huere staen vp tscauot, want sijt den ghesellen aen ghebrocht hadde, ende was ghebannen een iaer huyt den lande van Vlaendren.

[Den.v.sten dach van Meye]

¶ Item den.v.sten dach van Meye, so sandt tgarnisoen van Ardenburch eenen brief aen die van Brugghe, datmen den coninc soude stellen vp sijne vrije voeten, of si souden tlant al te nieten doen. Ende wildemen

[fol. CC.xlv.r]

hem vp sijne vrije voeten stellen, si waren te vreden datmen dan van paeyse sprake.