[Item vp den vierden en den.vi.sten dach van Meye]
Item vp den vierden dach van Meye, so quamen die vianden van Hulst ligghen in Ardenburch, ende quamen van daer een course doen te Brugghe voor die poorte. Ende vp tvelt achter sinte Cruys bi broerkins houe vertoochden si hem seere breet, ende quamen som ghereden tot byder coren muelene buyten der cruyspoorte. Waer omme dat dye Ruyters vander stede gram waren datmense nyet huyt laten en wilde, want sie hadder gheerne yeghen gaen schermutsen, maer men wildese niet huyt laten, maer dat dedemen om beters wille, want si sonden Heraulten ende trompetten ter stedewaert in aen die heeren vander stede ende aen tcommuyn, vraghende of si lieden hem lieden niet gheuen en wilden haren coninc, si souden dat laten van paeyse spreken, die welcke hem lieden niet ghegheuen noch gheconsenteirt en was, maer vertrocken weder omme Tardenburch waert, ende ouer die moerbeke brugghe sijnde, quamen die vanden Damme ende wierpen allomme die brugghen of, so dat si den anderen dach niet weder en keerden, want men verbeyde dye van ghendt metten fransoysen. Ende vp den.vi.sten dach van Meye so quamen die fransoysen te Brugghe inne met ontrent.C.peerden, ende waren terstont ghelogiert ten huyse van mijn heere van Huytkercke, ende tot Pieter metteneye, ende tot Willem houdmaerck, ende in alle die huysen vanden gheenen die met hem lieden huyter stede ghetrocken waren.
Auteursrechtvrij