Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen dach quam een mare te Brugghe]

Item vp den seluen dach quam een mare te Brugghe, als dat te Blanckenberghe met schepen vp ghecommen waren Ruyters van orloghen, dye daer tlandtsvolc begonsten te roouene, ende si en mochten van daer niet weder wech gheraeken, ten soude wel rijsen.xij.hueren inden nacht, want hem lieden twatere ontvallen was. Ende mijn here van Huytkercke sadt vp met al sijn huysghesinne, ende mijn here Pieter metteneye die Scouteeten, ende voort alle die hem lieden wel wilden, ende maecten also die maniere of si dat volck souden hebben bespronghen, ende dye Ambochten sonden volck mede ende sommeghe artijlgerye om die vianden te helpen weeren, metsgaders den landtslieden int Vrye, dye oock grote vergaderinghe maecten om tselue volck te helpen cranckene, want sy waren alle int kip hadmense willen beschamen. Ende dit waren al die ghene die waren vander compaengie vanden Baliu ende vanden Scouteeten. Eerst Willem Houdmaerc, Aernekin breydele die Foreestier van Brugge, Roelant byese, Heyne vanden berghe, Coppin van Cotengijs, gheseyt Coppin inden speghele, ende noch meer andere wel tot.xl.peerden toe. Ende vertreckende huyter stede sachternoens vp den voorseyde derden dach van Meye als thelich bloet besteit was, ende reysden naer Oudenburch, ende seyden tot den ghemeenen volcke die van haerlieder makaedgie niet en wisten, dat si dat daden omme dat die vianden vp hem lieden nyet letten en souden, ende daden tvoetvolc, dye wel.ij.^m. sterc waren eenen contrarien wech trecken. Ende Toudenburch sijnde, sliepen daer dien nacht, ende smorghens vrouch ten drie hueren waren si in roere.

[fol. CC.xliiij.v]

Ende mijn here dye Baliu dede vpstaen alle die van sijnder compaengye waren, ende vertrocken met eenen swijghere. Ende vp den wech sijnde, hadde noch bi hem die ghijde van Blanckeberghe, maer den Baliu ende den Scouteetene voornomt namen eenen sijt wech, dye liep naer der Nyeupoort. Doen vraechden eeneghe vanden vrylaten, waer hy dien wech henen wilde, ende seyden dat en es onsen wech niet. Doen seyde mijn here van Huytkercke dat hijt dede omme dat hem die vianden niet en souden gheware worden. Ende terstont volchde hem den Scouteeten Pieter metten eye ende huerlieder medepleghers, ende en rusten niet voor dat si waren ter Nyeupoort, huyte ghedaen.iij.Acouters, die saghen wel hoe dat si gheuaren hadden ende keerden wedere, ende eenen Willem vander bongerye clerck vanden Scouteetene. Ende aldus trocken die vianden wech met haren rooue, ende ons volc keerde weder thuys, metsgaders dat si gheenen Capiteyn en hadden, noch eenege hoofden met hem lieden, daer sy aen hoofden mochten.

¶ Ende al trocken dese dus wech, ten was gheen wondere want tghemeente groote ruythede bedreuen vp Pieter metteneye den Scouteetene inden burch, vp denseluen helich bloetdach sachternoens als thelich bloet in commen was, ende braken die roede vanden voorseyde Schout, ende meer andere foortsen. Nota.