Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item mer Phelips Phelips aldus weder omme commen sijnde binnen der Sluys]

[Den.xxiij.sten en xxv.sten dach van April]

Item mer Phelips Phelips aldus weder omme commen sijnde binnen der Sluys vp den.xxiij.sten dach van April, soe vant hy daer sijnen vadere mijn here van Rauesteyn, ende mijn here van Beuere, ende meer andere heren. Welcke voorseyde heeren begheerden te Brugghe te treckene omme te helpene den paeys te makene, het welcke also ghebuerde met meer andere redenen. Ende si quamen te Brugghe vp den.xxv.sten dach van April, daer si communikiereden metten Roomschen coninc, met vele sonderlinghe talen ende antwoorde. Ende aldus wesende te Brugghe, so quam die mare als dat mijn here van Meerwede wilde commen om te beroouene Blanckeberghe, ende ooc den Damme haddy gheconnen, also was haerlieder segghen, ende quam met drie hondert peerden met twee hondert voetknechten. Ende alsmen dat verhoorde, so stack men den dijck ten Damme inne den.xxv.sten dach van April aen beeden sijden, so dat si den Damme niet berijden en mochten, so dat dit ghedaen sijnde mijn here van Meerwede niet en quam, maer bleef daer hi was.