Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den xxviij.sten dach van April]

Item voort vp den xxviij.sten dach van April, so hilden die heren te Ghendt Raet tot den.ix.hueren inden auent, so dat die gracie Gods daer in wrochte, dat si veraccoordeirden in een minsamicheyt te gadere, soe dat si sloten te nemene.xij.mannen vander eender sijde ende xij.mannen vander andere sijde, die welcke souden alligieren ende paeysieren alle die sticken die den lande aenghinghen, den welcken paeys sy apointieren souden, ende niet daer of scheeden voor dat sijt teenen goeden paeyse ende accoorde ghebrocht souden hebben. Ende dit souden si eerst vertooghen ende te kennen gheuen den heren vanden bloede, hemlieden biddende dat si ten sluytene van desen souden willen commen binnen der stede van Ghendt. Ende dyt was te Brugghe ter hallen huyt gheroupen, ende was ooc met eenen gheboden eene deuote processye generale om te biddene den almeughenden god, dat hem ghelieuen soude sijne gracie daer inne te seyndene dattet voortganc hebben mochte, omme tot eenen goeden paeyse te commene.