Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort soe screuen die van Ghendt eenen brief aen dye van Brugghe]

[Den.xviij.sten en xxvij.sten en xxij.sten dach van April]

Item voort soe screuen die van Ghendt eenen brief aen dye van Brugghe, te wetene aen den here ende wet, hoe dat si begheerden dat wy van Brugge ons verbinden wilden, te wetene in alle die sticken die gheschiet ofte gheschien souden moghen, daer ghelijc last in te draghene, ende dat die twee leden ne gheen paeys maken en souden noch sluyten en souden, ten ware dat die derde accoordeirde. Daer vp die heren ende tcommuyn antwoorden, als dat si datte in gheender manieren consenteren en wilden, want als die twee leden eens waren ende van goede accoorde, dat dye derde soude behoren te volghen naer doude

[fol. CC.xliij.v]

costume. Ende dit ghebuerde den.xviij.sten dach van April. Maer den.xxvij.sten dach van April, so ghebuerdet dat Phelips van Rauesteyn reeds alle dye Casselrye vanden west quaertiere duere, omme te accorderene met hem lieden, daer si als doe wel mede te vreden waren. Ende aldus besich wesende, so quam Salisaert van Denremonde, ende quam met schepen ten Hasegarse vp, ende men seyde dat hi quam om dye stede vanden Damme in te nemene, twelcke nyet en ghebuerde, maer vertrack van daer te Meunicree, ende roofde daer ende vinck alle die lieden die hy ghecrijghen conste, ende voer metten buutijnc voor by de Sluys, ende track also weder van daer hi quam. Ende dit ghebuerde ooc den.xxij.sten dach van April, want men conste den capiteyn vanden Damme niet gheuinden om een course vp hem lieden te doene, ende was doe capiteyn vanden Damme mijn heere Iacob die voocht. Voort so quam wedere mijn here Phelips van Rauesteyn, passerende voor by Blanckeberghe, daer hi seyde dat si hem vromelick houden ende hebben souden huyter name vanden Hertoghe Phelips ende sijnen vadere.