[Item was gheordonneirt den.v.sten dach in April byder Wet ende dekenen]
Item was gheordonneirt den.v.sten dach in April byder Wet ende dekenen, als datmen doen soude een ommevrach om vander marct te commene, ende te treckene met vriendelicheyt in paeyse ende accoorde met eenen ghemeenen voyse, midts sekerhede van haerlieder verbant, daermen borghe voren stellen soude, aengaende haerlieder pointen ende preuilegien. Ende desen ommevrach was ghedaen vp die halle, sachternoens ten twee hueren. Ende doe ghinghen si oock te Rade als aengaende den coninc, wie bi hem wesen soude ende hem bewaren. Ende dye mare ghinc als dat Ian de keyts sone soude wesen schinckere vanden coninc. Ende de selue Ian de keyt hadde te voren gheseyt dat hi wel wilde dat die coninck doot ware. Ende omme dieswille, ende meer andere causen, ende om dat die van Ghendt naer haerlieder ordonnancie cocx ende knapen brochten omme den coninck te dienene met hem lieden van Ghendt, so wilde het commuyn van Brugghe metten pingioene inden burch loopen, omme alle den hoop doot te slane die van Ghendt ghecommen waren om den voorseyde dienst te doene vanden Coninck, want dye van Brugghe en wilden den coninck die cleenicheyt niet doen, hoe wel dat hijt hem lieden niet en betraude.etc. Maer den Raet wort verandert by eeneghe wijse mannen vanden.xvij.neeringhen datmen soude nemen viere edele mannen van Ghendt, ende insghelijcx viere van Brugghe, ende viere van Ipre, ende noch vier notabele vander stede van Brugghe. Ende oock dat die wake soude ghehouden worden van inborlinghen vander stede van Brugghe, ende van anders gheene, want dye van Ghendt maecten te seere den meestere contrarie den coninck ende te sijnen ongherieue. Ende men vraechde den coninck, offer yement ware vander oordonnancie van sijnen dienste die hem mesliefde, men soudse veranderen, ende nyeuwe in hare stede stellen, in dien datter yement ware die yegens hem gheweist hadde ofte hem yet mesdaen hadde in eenighen sticken, ende aldus worden ghesloten metsgaders dat die Coninc weltevreden was, met die ghene die bi hem waren. Ende aldus byden accoorde vanden drie leden tlandts van Vlaendren, soe ghebuerdet dat si met grooter minsamicheyt ende ghenouchten binnen den seluen auende trocken ende schieden vander marckt, elck in tsijne. Ende eer si vander marct schieden, so braken si den pijnbanc ende tscauot ende tparck, ende brochte thout al ouer hoop ende maeckten daer of een schoon vier. Ende men dede die stadt speillieden spelen vp die halle van groter blijschepen dat si so minlick ende paeysiuelic vander marct schieden Ende dit vertrecken vander marct met toortsen ende met vierpannen gheduerde van sauents ontrent den.vij.hueren tot den.xi.hueren inden nacht. Ende dye.xvij.neeringhen vergaderden ten Fremenueren inden pand in eenen ronden rinck, ende bedancten daer malcanderen, ende swoeren deene den anderen ghetrauwe te sijne ende bystant te doene, waert datmen tcommuyn gheen ghelijc en dede alsoot belooft was, dat si met malcanderen weder ter marckt souden commen, sonder delaygieren. Ende in sghelijcx so hadden alle dye andere ambochten ende neeringhen malcanderen belooft. Ende dit of ghescheeden vander marct ghebuerde vp den paeschauent, ende hadden daer ghestaen van onser vrauwen auent te Lichtmesse, den eersten dach van Sporcle, twelcke was wel.ix.weken of meer, tot den paeschauent als voorseyde es.Anno.M.iiijc.ende.lxxxviij.
Auteursrechtvrij