Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item noch vp den.ij.sten en den vierden dach van April]

Item noch vp den.ij.sten dach van April, soe quam me vrauwe van Remerswale binnen der stede van Brugghe, ende brochte het coffer metten brieuen dye welcke men las vp den vierden dach van April vp die marct voor al tghemeente. Maer eermen die brieuen las, so deidemen een ghebodt, als datmen tusschen der stede van Brugghe ende den Damme gheene schepen en soude laten ligghen in dye Reys, si en souden sauents binnen der stede van Brugghe of binnen den Damme ghebrocht worden vp groote correctie, die daer of in ghebreke ware. Ende terstont daer naer so ghinck men lesen die brieuen vanden Preuilegien vanden Vryen, ende dye nyeuwe onlancx ghemaeckt, als dat si souden wesen een ledt, dye welcke brieuen terstont ghecasseirt ende te nyeuten waren ghedaen vp dye marct vp het schauot, ten by sijne ende aensien van elcken dye ter marct waren.

¶ Voort vp den seluen tweesten dach van April soe hoordemen segghen datter bouuen waren buyten der stede van Brugghe, ten huysekinne van Cornelis, twelcke stont byder panne, die welcke voorseyde bouuen den volcke groote foortse ende ouerlast deden. Ende men ghinck daer, ende dye bouuen waren som gheuanghen ten voorseyden huyseken, visschende in dye walgracht, omme also haerlieder bouuerye te bedeckene, ende waren drie vrye scheppers van Brugghe ende een knape, ende waren ghebrocht binnen der stede van Brugghe vp den steen.