Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den tweesten dach van April dedemen een ghebodt ter hallen huyt]

Item voort vp den tweesten dach van April dedemen een ghebodt ter hallen huyt, dat alle die poorters die waren buyten ofte absent der stede, dat si binnen den derden daghe in die stede commen souden, vp die verbuerte van hondert pont groote, ende bouen dien noch ghecorrigiert te sijne alsoo dat behooren soude. Ende dat alle dye haghepoorters binnen commen souden wel ghewapent ende voorsien, so sy liepen haerlieder lijf auentueren wilden. Ende vp den seluen dach was tvolck ghestelt in ordonnancie, soe dat elck wiste waer hi gaen soude in diender yet te doene quame, ende dat noot ware, ende dat by Dyseniers.

¶ Item was oock vp den seluen tijt verboden dat gheene meysens haerlieder bouuerye houden en souden vp dye marckt, noch oock onder die Crane, noch ooc nieuwers byder strate, vp dye verbuerte van haerlieder vpperste cleet, beede man ende wijf.