Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Voort vp den.v.sten dach van April]

Voort vp den.v.sten] dach van April, soe waren eeneghen ghe-

[fol. CC.xlij.v]

deputeirde vander stede van Ghendt ghecommen met een voor aduijs, te wetene om den Roomschen Coninck te bewarene, ende om hem dienaers ende officiers te stellene ende sijne bewaerders van hem te absenteirene. Ende es te wetene dat die van ghendt gheordonneirt hadden als Schinckere te sijne vanden Coninck dye ionghe Ian de Keyt, ende meer andere die hem ghedient soude hebben. Maer dye vander stede van Brugghe antwoorden als dat die entreprijse hem lieden niet soe naer aen en ghinck, maer behoorden dye van Brugghe daer of die voorhant te hebbene omme doordonancie te stellene. Maer seyden die van brugghe, als dat die van Ghendt seynden souden vier edele mannen byden Roomschen Coninck, maer in dien si hem nyet aen en stonden, dat si andere seynden souden, vp en dyen dat den Coninck beuinden conste dat sy metten Fransoysen hem contrarie gheweist hadden. Ende in sghelijcx viere vander stede van Brugghe, ende viere van Ipre. Ende dat die coninck behouden soude sijnen Prouuere, ende sijnen schenckere, ende een groot heere, ende sijnen cock, ende sijnen backere, ende sijnen scheppere. Ende die wake souden verwaren die neghen sware Dekens vander stede van Brugghe met den anderen Dekens ende commuyne. Ende als doe deidemen een ghebodt dat nyement gheene spijse verquisten en soude vp grote boete, ende dat alle die haghepoorters souden commen houden haerlieder Natael te Brugghe, ten minsten twee daghen in dye Paessche daghen, vp verbuerte van haer lieder poorterschip.