[Item vp den.xxx.sten van Maerte en den eersten dach van April]
Item vp den.xxx.sten van Maerte, ontrent den.xij.hueren inder nacht so quam een twist tusschen den.xvij neeringhen ende der poorterye, ende dyt was die waer omme dat die vander poorterye hadden gheleyt den standaert vander poorterye ende alle die pingioenen tusschen die rebben van hueren logijste, ende sy en deden niet waken dat die schamele haghepoorters. Ende Ioos Centurioen als hooftman vander gheheelder poorterye, daer omme dat dye.xvij.neeringhe seyden dat men dye clocke aen een boort slaen soude, ende datmense alle doot slaen soude omme dat si hem tstick so cleene aentrocken, waer omme die voornomde Ioos Centurioen hem lieden so vriendelick toe sprack, ende badt omme die doot die god starf dat si met redelicke woorden wilden te wercke gaen, hy soude hem lieden bystant doen om te hebbene een trompet, ende metten seluen trompette hem lieden doen aduerteren die in ghebreke waren. Ende beloofde daer inne sulcke prouisie te doene, datter gheen ghebrec meer en soude wesen by hem lieden alsoo hi oock dede, ende daer mede bleuen si gherust. Maer seyden in dient meer ghebuerde si soudense dootslaen vp haerlieder bedde. Ende begheerden als doe ooc te wetene waer die brieuen so lange bleuen, daer omme datmen ghesonden hadde te Remerswale, dat si te dier tijt noch nyet ghecommen en waren. Ende datmer niet en stelde prouisie offer eenich allaerme ofte twist quame, waer dat elck soude gaen ofte loopen in sijn plecke ofte plaetse ten sijne, dat wy nyet al ouer hoop loopen en souden sonder maniere ofte ordonnancie. Ende dyt was aldus gheordonneirt vp den eersten dach van April.
Auteursrechtvrij